Сүүлийн жилүүдэд тэмбүү өвчнөөр өвчилж байгаа хүмүүсийн тоо эрс нэмэгдсэн бөгөөд 2016 оны аравдугаар сарын байдлаар улсын хэмжээнд тэмбүүтэй хүний тоо 9014-д хүрчээ . Энэ онд л гэхэд 1336 хүн тэмбүү өвчнөөр өвчилсөн байна.  Үүнээс гадна эцэг, эхийнхээ амьдралын буруу дадал, хайхрамжгүй байдлын золиос болж  буй хүүхдүүдийн тоо олширсоор байна. Тодруулбал, тэмбүүгийн үүсгэгч нь эхсийн цусны эргэлтээр дамжин урагт халдварласнаар төрөлхийн тэмбүүг үүсгэдэг бөгөөд улсын хэмжээнд 2010 оноос хойш төрөлхийн тэмбүүтэй 220 гаруй хүүхэд төржээ Энэ онд л  гэхэд 51 хүүхэд төрөлхийн тэмбүүтэй төрсөн байна.  Ийм өвчтэй хүүхдүүд амьд үлдэх нь тун ховор. Амьд гарлаа ч харааны болон тархины гажигтай болдог аж. 2011- 2014 онд төрөлхийн тэмбүү өвчнөөр 25 хүүхэд амиа алдсан бөгөөд үүнээс 2011 онд дөрвөн хүүхэд, 2012 онд найман хүүхэд, 2013 онд гурван хүүхэд, 2014 онд арван хүүхэд амиа алджээ. Түүнчлэн 2015, 2016 онд төрөлхийн тэмбүү өвчнөөр амиа алдсан хүүхдийн тоо эрс нэмэгдсэн байна.

Тиймээс та бүхэнд тэмбүү өвчин ямар замаар дамжин халдварладаг, хэрхэн урьдчилан сэргийлэх  зөвлөмжийг хүргэж байна.

Тэмбүү өвчний халдварлах замууд

-Тэмбүү өвчинтэй хүнтэй хамгаалалтгүйгээр /бэлгэвчгүй/ бэлгийн хавьталд орсон тохиолдолд

-Халдвартай жирэмсэн эмэгтэйгээс урагт дамжих

-Халдварлагдсан цус, цусан бүтээгдэхүүн, зүү, тариураар дамжин халдварлах

Тэмбүү өвчнөөс хэрхэн урьдчилан сэргийлэх вэ

-Тохиолдлын бэлгийн хавьтлыг тэвчих (Гэр бүлээс гадуур бэлгийн харьцаанаас зайлсхийх)

-Гэр бүлийн хосууд бие биедээ үнэнч байх

-Бэлгэвчийг зааврын дагуу тогтмол, зөв хэрэглэх

-Тохиолдлын бэлгийн хавьталд хамгаалалтгүй орсон үед өвчний шинж тэмдэг илэрсэн эсэхээс үл хамааран шинжилгээ өгөх

-Жирэмсэн эмэгтэйчүүд хяналтанд эрт хамрагдаж, тэмбүү өвчнийг илрүүлэх шинжилгээг хийлгэх (2 удаа)- /Хүүхдэд дамжих төрөлхийн тэмбүү өвчнөөс сэргийлнэ/

-Архи, мансууруулах бодисыг хэрэглэхгүй байх

Эх сурвалж: ДОХ, Сүрьеэтэй Тэмцэх Үндэсний сан 

 Үндэсний статистикийн хороо

Эрүүл мэндийн хөгжлийн төвийн эрүүл мэндийн үзүүлэлт статистик

Халдварт өвчин судлалын үндэсний төв