Өнөөдөр сүрьеэтэй тэмцэх дэлхийн өдөр. Дэлхийд нас баралтын тэргүүлэх арван шалтгааны нэг нь сүрьеэ бөгөөд жил бүр 10.4 сая өвчилж, 1.8 сая хүн уг өвчний улмаас нас барьж байна. Монгол Улсад сүүлийн таван жилд хийсэн эрүүл мэндийн статистик үзүүлэлтээр сүрьеэ нь улсын хэмжээнд бүртгэгдэж буй нийт халдварт өвчний 9.8 хувийг эзэлж, жил бүр 4.000 гаруй хүн сүрьеэ өвчнөөр өвчилж байгааг тогтоожээ. Жил тутам сүрьеэ өвчний улмаас хөдөлмөрийн чадвар алдалтын группт орох тоо нэмэгдэж байгаа бөгөөд тэр дундаа 70-аас дээш хувиар группт орох нь улам бүр өссөөр байгаа аж. Тиймээс УНТЭ-ийн уушгины эмгэг судлалын төвийн тасгийн их эмч, Д.Содгэрэлийн сүрьеэ өвчний талаарх зөвлөмжийг хүргэж байна.

Сүрьеэ гэж ямар өвчин бэ, юунаас шалтгаалдаг вэ

Сүрьеэ бол хүчилд тэсвэртэй нянгаар үүсгэгддэг, амьсгалын замын халдварт өвчин. Зөвхөн уушгины сүрьеэгээр өвчилсөн, цэрний шинжилгээнд нь сүреэгийн нян эсрэг байгаа хүн ханиах, найтаах, ярих, дуулах үед сүрьеэгийн нян агаарт цацагдаж бусдад халдвар тараах боломжтой. Ясны, уушгины, булчирхайн гэх мэтээр бүх төрлийн эрхтний сүрьеэ байдаг. Манай улсын нийт хүн амын 70-90 хувь сүрьеэгийн халдвартай байдаг ч тухайн хүний биеийн дархлаанаас шалтгаалаад өвчлөх нь хүн бүрт харилцан адилгүй байдаг. Өөрөөр хэлбэл, сүрьеэ өвчний үүсгэгч нян ихэвчлэн хүний биед байж байдаг бөгөөд тухайн хүний дархлаа сул байх юм бол сүрьеэгээр өвчлөх эрсдэл нэмэгдэж байдаг. Сүүлийн үед оюутнууд сүрьеэгээр өвчлөх тохиолдол их гарч байгаа бөгөөд энэ нь биеийн дархлаа суларсан, амин дэмтэй хоол унд хэрэглэдэггүй, архи тамхины хэтрүүлэн хэрэглэсэнтэй холбоотой байгаа. Биеийн дархлаагаа л сайн дэмжих юм бол сүрьеэгээр өвчлөхгүй байх боломжтой. 

Сүрьеэ өвчний үед ямар шинж тэмдэг илрэх вэ 

Нэгдүгээрт маш их ханайлгаж, бага хэмд халуурна. Хоёр долоо хоногоос дээш хугацаагаар ханиалгаж, шалтгаангүй халуурч, хөлрөх шинж илэрч, бие сульдаж байгаа бол яаралтай эмчид хандах хэрэгтэй. Ядарч сульдаад турж эцээд арьс харлах юм бол эмчид хандах хэрэгтэй. Гэтэл иргэдийн дийлэнх нь ханиад туссан гэсэн онош өөртөө тавиад сүрьеэгээ хүндрүүлээд ирэх тохиодол их гардаг. Хүндэрсэн тохиолдолд хийгдэх эмчилгээнээс эхлээд, эдгэх нь удаан үргэлжилдэг. Уушгины сүрьеэтэй хүний хувьд мэдэхгүй удаан явснаас болоод уушгинд хөндий үүсч, заавал хагалгаанд орох шаардлагатай болдог. 

Сүрьеэ өчний эмчилгээ, оношилгоо, хэрхэн сэргийлэх вэ

Сүрьеэ бол эм уугаад эмчлэгддэг өвчин. Гэхдээ сүүлийн үед иргэд антибиотек зохисгүй хэрэглэснээс үүдэлтэй тухайн үүсгэгч нян тэсвэртэй болж, улмаар эмэнд дасалтай сүрьеэ их гарч байна. Тиймээс иргэд эмчийн заавраар, жорын дагуу эм хэрэглэж байхыг зөвлөмөөр байна. Мөн эмийн сангууд эмийн жоргүйгээр антибиотек худалдахгүй байх нь чухал. Хаврын улиралд дархлаа сулардаг тул амин дэмтэй хоол хүнс хэрэглэж, витамин уух хэрэгтэй. Дархлаагаа дэмжиж байна гээд өөрийн дураар эм ууж, тариа хийлгэж болохгүй. Яахав дусал хийлгэж болох ч зарим тариа нь биеийн дархлааг дэмжих бус, сааруулах үйлчилгээтэй байдаг. Аль болох хоол ундаараа дамжуулан амин дэмээ нөхөж, дархлаагаа сайжруулах хэрэгтэй. Биеийн дархлаагаа л сайн дэмжих юм бол сүрьеэгээр өвчлөхгүй байх боломжтой. 

Хэн сүрьеэгийн халдвар авах өндөр эрсдэлтэй вэ