ШУА-ийн Хими, химийн технологийн хүрээлэнгийн Байгалийн нэгдлийн химийн лабораторийн эрхлэгч, академич, шинжлэх ухааны доктор, профессор Д.Батсүрэн “Эх орны байгалийн химийн нэгдлийн судалгаа, өвөрмөц бүтэц, биологийн идэвх” сэдвээр лекц уншин байгалийн шинэ бодис дауринол нь хүний төрөл бүрийн хорт хавдрыг эмчлэх, урьдчилан сэргийлэх өндөр идэвхтэй болохыг баталсан судалгааныхаа үр дүнгээс танилцууллаа. Лекцийн дараа  Д.Батсүрэн гуайтай цөөн хором ярилцсанаа хүргэж байна.

-Сайн байна уу. Бүх төрлийн хорт хавдрыг эмчлэх боломжтой шинэ бодисыг эмийн ургамлаас гаргаж авсан гэлээ. Судалгааны ажлаас нь  яриагаа эхлүүлье?

-Органик бодисыг дотор нь синтезийн ба байгалийн гэсэн үндсэн хоёр бүлэгт хувааж үздэг. Монголын байгалийн органик бодисын гол түүхий эд нь ургамлын баялаг бөгөөд түүний дотор 700 гаруй эмийн ургамал чухал байрыг эзэлдэг. ШУА-ийн Хими, химийн технологийн хүрээлэн эмийн ургамлын дотор агуулагдаж байгаа фармакологийн тодорхой үйлдэлтэй биологийн идэвхит бодисууд болох алколанд, флавонойд, кумарин, ксантон зэрэг бага молекулт бодисуудын бүрдэл, химийн нарийн бүтэц, физик шинж, төлөвийг судалдаг юм. Нэг үгээр хэлбэл, эмийн ургамал дотор агуулагдаж байгаа биологийн идэвхит нэгдлийг ямар нэг химийн өөрчлөлтөд оруулахгүйгээр цэвэр байдлаар гаргаж, тэдгээрийн физик, химийн шинж төлөв, молекулын бүтэц байгууламжийг судалдаг. Хүрээлэн маань байгуулагдсан цагаас хойш дэлхийн байгалийн химийн нэгдлийн шинжлэх ухаанд олон шинэ бодисын нээлт хийсэн. Үүний нэг нь миний БНСУ-ын эрдэмтэнтэй хамтран хийсэн хорт хавдрыг эмчлэх шинэ бодисыг гарган авсан явдал юм.