Асашёрюү Д.Дагвадорж дэлхийн цирк байгуулна гэж хэлээд 2008 онд циркийг хувьчилж авч байв. Гэвч АСА аварга циркийг хувьчилсан цагаасаа хойш өөр зориулалтаар ашиглаж, паб цэнгээний газар ажиллуулж байгаад 2020 оны долдугаар сард засвар эхлүүлж, циркчдийг “гудамжинд гаргасан”.

Циркийн барилга балгас болж, циркийн урлагынхан стандарт бус эрсдэлтэй нөхцөлд бэлтгэл сургуулилтаа хийж байгаа талаар бид өмнө нь хэд хэдэн удаа сурвалжилж байв. Манай редакц 2022 оны долдугаар сард циркийн барилгын ажлын талаар сурвалжлага бэлдэх үед АСА циркийн зүгээс 2023 оны хавар гэхэд засварын ажил дуусна гэх мэдээллийг өгч байсан юм. Гэвч 2023 оны намар болоход циркийн засвар дуусаагүй хэвээрэй, циркчид гудамжинд, барилга нь балгас болов.

Тэгвэл хувьчилсан эзэн нь хаяж, салбарын сайд нь хүртэл анхаарахгүй орхисон Монголын циркийн нөхцөл байдлын талаар Францын “Agence France-Presse”, Английн “The Telegraph”, Германы “Deutsche Welle”, Хонконгийн “South China Morning Post” зэрэг дэлхийн нэр хүндтэй, томоохон хэвлэлүүд сурвалжилсан байна. Тэд Монголын циркийг аврах асуудлыг хөндөж, гол нь хүүхдүүдийн эрх ноцтой зөрчигдөж байгааг харуулжээ.

Гаднын хэвлэлүүд мэдээлэхдээ "Монголын циркчид 100 жилийн настай хуучин циркийн барилгыг түрээсэлж бэлтгэл сургуулилтаа хийдэг. Тэдэнд орчин үеийн өөрийн гэсэн байр байхгүй. Стандартын шаардлага хангахгүй балгас болчихсон хуучин циркийн энэхүү бэлтгэлийн заалнаас дэлхийн хамгийн алдартай “Cirque Du Soleil” циркийн олон уран бүтээлч төрөн гарсан. Монголдоо ганц гэгдэж байсан циркийн барилга үгүй болсноор Монголын залуу үеийн циркчид өнөөдөр мэргэжлийн хяналтын дүгнэлтээр нурах эрсдэлтэй гэж тогтоосон байранд бэлтгэл сургуулилт хийж байна.