Дорноговь аймгийн Сайншанд суманд хичээлдээ явахаар гараад ор сураггүй алга болсон сурагч охиныг хайх эрлийн ажиллагаа үргэлжилж байна.

Охиныг автомашиндаа суулгаж авч явсан гэх сэжигтнүүдийг саатуулсан бөгөөд охиныг одоогоор олоогүй байгаа гэдэг мэдээллийг цагдаагийн байгууллагаас өгч байгаа.

Аймгийн цагдаагийн байгууллага Сайншанд сум болон аймгийн хэмжээнд хяналтын камер хангалтгүй, хувийн хэвшлийн байгууллагуудын хяналтын камерын бичлэгийг ашигласан ч техникийн шаардлагыг хангахгүйн улмаас охиныг авч явсан автомашины улсын дугаарыг тогтоох боломжгүй байсан талаар мэдээлсэн. Аймгийн төв 2019 онд бүрэн хяналтын камертай болгосон ч ажиллагаагүй болоод зургаан сар болж байгаа аж. Уг үйл явдал нь гудамж талбайд хяналтын камер байршуулж гэмт хэргээс урьчилан сэргийлэх, иргэдийн аюулгүй амар тайван байдлыг хангах асуудалд анхаарах шаардлагатай байгааг тодорхой харуулсан юм. Мөн Дорноговь аймгийн Замын-Үүд сумаас найман настай сурагч охин алга болж, өнөөдрийнх шиг үйл явдал өрнөж байснаас хойш 6 жилийн хугацаа өнгөрсөн ч охиныг мөн л олж чадаагүй байгаа юм.

Тэгвэл 2024 оны төсвийн төсөлд Дорноговь аймагт 105.6 тэрбум төгрөгийн хөрөнгө оруулалт тусгасан. Эдгээрийн дунд ундны цэвэр усны хангамжийн дэд бүтэц, аймгийн ДЦС-ын өргөтгөл болон алга болсон “Д” охины кейс дээр мөн хөндөгдсөн сургууль, цэцэрлэгийн хүртээмжийг нэмэгдүүлэхэд чиглэсэн хөрөнгө оруулалтыг суулгажээ.

Гэхдээ Дорноговь аймгийн хэмжээнд хяналтын камерын хүрэлцээ байхгүй, түүнээс болж 12 настай сурагчийг эрэн хайх ажиллагаанд хүндрэл учирсан бодитой жишээ нь төсөвт нэн шаардлагатай ажлуудыг эрэмбэлэх зарчмаар хөрөнгө оруулалтын жагсаалтыг батлах асуудалд анхаарлаа хандуулах шаардлагатай байгааг давхар харуулж байна. Тухайлбал, Соёлын сайдын багцад Сайншанд сумын Саран хөхөө театрын барилгын 2024 оны санхүүжилтэд 18.5 тэрбум төгрөг, Дэлгэрэх суманд 4.1 тэрбум, Эрдэнэ суманд 3.4 тэрбум төгрөгөөр шинээр соёлын төв барих төсөв орж ирсэн нь хэмнэж болох зардал бөгөөд уг төсвийн эх үүсвэрээр илүү чухал хөрөнгө оруулалт хийж болох юм.  

Манай редакц төсөв хэлэлцэх үйл явцад олон нийтийн мэдэх эрхийг хангах зорилгоор Монгол Улсын төсвийн хөрөнгөөр 2024 онд санхүүжүүлэх хөрөнгө оруулалтын төсөл, арга хэмжээ, барилга байгууламжийн жагсаалтын мэдээллийг боловсруулж, хайлтын систем болгон байршуулсан. Тиймээс уншигч та линкээр орж ирэх оны төсвийн төсөлд тусгагдсан хөрөнгө оруулалтын мэдээллүүдийг шүүж үзэх, шаардлагагүй зардлыг илрүүлж, бусдад мэдээллэх замаар төсвийн үргүй зардалд хяналт тавих замаар төсвийн үр ашиггүй байдлыг бууруулах ажилд нэгдэхийг уриалж байна.