Лондоны арбитраас “Эрдэнэт” үйлдвэрийг үндсэн зээлийн 51 сая, арбитрын зардал, хүү, алданги тооцсон 44 сая, нийт  99 сая долларыг  “Стандарт” банкинд төлөх шийдвэр гаргасан тухай мэдээллийг манай сайт мэдээлсэн билээ. Уг асуудлаар Засгийн газрын зарим сайд тайлбар өглөө.

-Уул уурхай хүнд үйлдвэрийн сайд Д.Сумъяабазар: Эрдэнэт үйлдвэр дээр үүссэн 51 сая долларын асуудал нь хүү, торгуультайгаа нийлээд 102 сая орчим доллар болсон гэсэн мэдээлэл байгаа. Сардаа 800-900 мянган долларын хүү нэмэгдэж байгаа юм билээ. Гэхдээ хариуцаж буй банктай ярилцаж, ойлголцож байж асуудал шийдэгдэх байх гэж бодож байгаа. Гэхдээ Эрдэнэт үйлдвэрийн өмч хөрөнгийг битүүмжлэх, үйл ажиллагаанд нь сөрөг байдлаар хандах асуудал гараагүй байгаа. Гэхдээ энэ зээлийн асуудлыг яаралтай шийдэх ёстой гэж бодож байгаа. Энэ асуудал дээр итгэмжлэгдсэн төлөөлөгч, хууль зүйн дотоод хэргийн яамнаас албан ёсоор хариуцаж байгаа хүмүүс ажиллаж байгаа. Гэхдээ битүүмжлэх үйл ажиллагаанд нь сөргөөр нөлөөлж болзошгүй байгаа. Үүнийг хариуцаж буй хүмүүс нь зохих ёсны арга хэмжээг нь авч байгаа.

Ц.Нямдорж: Үүссэн асуудлыг "Эрдэнэт" үйлдвэр Стандарт банктай ярилцана

Хууль зүй, дотоод хэргийн сайд Ц.Нямдорж: Энэ маргаанд Засгийн газар ямар нэгэн тал болж оролцоогүй. Тиймээс Засгийн газарт хүлээх үүрэг байхгүй. Баталгаа гаргасан гэдэг асуудал эрүү үүсгэж шалгаж байгаа. Ингэхдээ  2013, 2014 оны үед эрүүгийн хэрэг үүсчихсэн. Сүүлд Хадгаламж банкийг хураах асуудал үүсч, Ш.Батхүү гэдэг хүн. Дээр нь, шүүхийн шийдвэрийг биелүүлээгүйтэй холбогдуулан алданги, хүү тооцдог. Үүний талаар цаашдаа яриа хэлэлцээр хийх шаардлага байгаа юм. Түүнээс яг Эрдэнэтийг битүүмжилсэн гэдэг нь худлаа. Энэ бол худал мэдээлэл тарааж олон нийтийг ойлгомжгүй байдалд оруулж байгаа л явдал юм.

Давж заалдах ажиллагаа нь хийгдсэн. Тэгээд үр дүнд хүрээгүй юм байна. Нийт дүнгээрээ 51 сая долларын үндсэн зээл байгаа. Үлдсэн яригдаж буй мөнгө тооцогдож буй алданги, хүү, торгууль зэрэг нь юм. Үүнийг Эрдэнэт үйлдвэр Стандарт банктай ярилцах боломж байгаа. Үүсэн  маргаанд Засгийн газар, хууль зүйн яам оролцоогүй. Маргаан нь зөвхөн Эрдэнэт үйлдвэр, Стандарт банк хоёрын асуудал юм.