“Дэлхийн монгол” подкастын дөрөв дэх дугаарт дэлхийн санхүүгийн топ группийн нэг, Их Британийн HSBC банкны ахлах менежер, Люксембургийн их сургуулийн багш Б.Хуланг урьж оролцууллаа.

Түүнийг сүүлийн долоон жил Люксембург улсад хөрөнгө оруулалтын менежментийн чиглэлээр ажиллаж байгаад Монголдоо ажиллаж, амьдрахаар ирээд удаагүй байхад нь уулзлаа. Энэ удаа Б.Хулангийн малчны хотноос гараад олон улсад хүлээн зөвшөөрөгдсөн мэргэжилтэн болсон сонирхолтой түүхийг та бүхэнтэй хуваалцаж байна.

Энэ тухай Б.Хулан “Миний боловсролтой болсон хувийн түүх урт зам, “өндөр төлбөр’-тэй байсан. Хэдийгээр дунд сургууль, их сургуулиа үнэ төлбөргүй улсын сургуульд суралцаж төгссөн ч үүний төлөө би 12 настайгаасаа аав ээжээсээ хол амьдарч, айлаар байх, гэрээ санах, өлсөх зэрэг олон бэрхшээлийг давах, багаасаа бие даах шаардлагатай тулгарсан. Аав, ээж маань ч хүүхдүүдээ бичиг үсэгтэй, боловсролтой хүн болгохын төлөө залуу нас, амьдралаа зориулсан юм. Иймээс жирийн айлын хүүхэд боловсрол эзэмших зам тийм урт, бартаатай биш байгаасай гэж чин сэтгэлээсээ хүсдэг” хэмээн ярьсан юм.

Тэрээр олон улсад хүлээн зөвшөөрөгдсөн мэргэшсэн санхүүгийн шинжээчийн  “CFA’ цолыг эзэмшдэг цөөн Монголчуудын нэг бөгөөд сүүлийн жилүүдэд альтернатив хөрөнгө оруулалтын сан, ногоон хөрөнгө оруулалтын сангууд дээр төвлөрч ажиллажээ.