Үндэсний статистикийн хорооноос гаргасан тоо баримтаар Монгол Улсын нэг өрхийн сарын дундаж орлого 2020 оны дөрөвдүгээр улирлын байдлаар 1.42 сая төгрөг байна. Манай улсын өрхийн сарын дундаж орлого сүүлийн гурван жилд нийт дүнгээр 292 мянган төгрөгөөр өссөн аж. Гэвч 2020 оны дөрөвдүгээр улиралд энэ үзүүлэлт өмнөх улиралтайгаа харьцуулахад 88 мянган төгрөг буюу 5.8 хувиар буурчээ.

Харин 2020 оны дөрөвдүгээр улирлын байдлаар нэг өрхийн сарын дундаж зарлага 1.35 сая төгрөг байгаагаас 290 мянган төгрөг нь хоол хүнсний зардал байна. Сүүлийн гурван жилд өрхийн сарын дундаж зарлага тогтмол өссөн ч хүнсний зардал харьцангуй тогтвортой байж иржээ. Гэхдээ өрхийн хүнсний зарлага сүүлийн хоёр улиралд буурсан. Ялангуяа нийслэлд энэ үзүүлэлт сүүлийн нэг жилд 10.1 хувиар буурсан бол улсын хэмжээнд 6.4 хувь буурсан байна.

Энэ нь өргөн хэрэглээний бараа бүтээгдэхүүний үнэ сүүлийн нэг жилд огцом өссөнтэй холбоотой байгаа юм. Тухайлбал, нийслэлийн төвийн зургаан дүүргийн томоохон 11 зах, худалдааны төвүүдэд үнийн судалгаа явуулахад монголчуудын хамгийн өргөн хэрэглэдэг хүнсний 18 бүтээгдэхүүний багцалсан үнэ сүүлийн нэг жилд 19.8 хувиар өссөн байна. 

Өөрөөр хэлбэл монголчууд жилийн өмнө 100 мянган төгрөгөөр авч байсан хүнсээ өнөөдөр 120 мянган төгрөгөөр худалдан авч байгаа юм.  

Өргөн хэрэглээний бараа бүтээгдэхүүний үнийн 2020 оны дөрөвдүгээр сарын дундаж ханшийг 2021 оны дөрөвдүгээр сарын 28-ны өдрийн дундаж ханштай харьцуулбал:

Шударга өрсөлдөөн, хэрэглэгчийн төлөө газрын дарга Б.Бат-Эрдэнээс энэ талаар тодруулахад: “Сүүлийн нэг жилд мах, нарийн ногоо, өндөгний үнэ хамгийн өндөр өссөн. Өндөгний үнэ сүүлийн өдрүүдэд өссөн нь ОХУ-д улаан өндөгний баяр тохиож, өндөгний импорт тасалдсантай холбоотой. БНХАУ-аас ирэх импортын урсгал мөн тасалдсан нь нарийн ногооны үнэ өсөх шалтгаан болсон. Үндсэндээ хоёр хөрштэй хийх худалдаа саарсан, тээврийн зардал өссөн зэрэг шалтгаанаас болж импортын өргөн хэрэглээний бараа бүтээгдэхүүний үнэ өссөн. Харин 67 сая малтай Монгол Улсад махны үнэ ийм өндөр байгаа нь зохицуулалт байхгүй байгааг илтгэнэ” гэсэн юм.  

Харин иргэдийн хувьд өргөн хэрэглээний бараа бүтээгдэхүүний үнэ өссөнөөр өмнө нь тор дүүрэн хүнс авдаг байсан мөнгөөрөө тал тор хүнс худалдан авдаг болсон талаар ярьж байв. Зарим өрхийн хувьд мах, өндөг, нарийн ногоо, жимс жимсгэнэ өдөр тутмын хэрэглээнээс тансаг хэрэглээ болж хувирсан байна.