ОХУ-д болж буй хөлбөмбөгийн дэлхийн аварга шалгаруулах тэмцээний өчигдрийн тоглолт болох Коста-Рика- Швейцарын шигшээ багийн тоглолтын бөмбөгний хөтөч хүүхдээр Ө.Амар ажиллалаа. Ийнхүү тэрээр хөлбөмбөгийн ДАШТ-ий талбайд гарсан анхны монгол хүүхэд болжээ.
Ө.Амар "Эх оронч хүн гэж халаасандаа дандаа хогтой явдаг хүнийг хэлнэ"
Official Match Ball Carrier /OMBC/ буюу хөтөч хүүхдийг нийт 64 тоглолтын 40 тоглолтод нь зохион байгуулж буй улс буюу ОХУ-аас сонгосон бол үлдсэн 24-т нь Монгол Улсаас өрсөлдөөд нэг эрх авчээ. Монголоос 600 гаруй хүүхдийн дунд сонгон шалгаруулалт явуулж Ө.Амарыг сонгосон байна.
Сонгон шалгаруулалтыг “Киа Моторс Монгол” ХХК-иас “My dream Kia” эссэ бичлэгийн уралдааныг зарлаж, шалгарсан хүүхдүүдтэй ярилцлага хийж ялагчийг тодруулсан байна. Ярилцлагын үеэр 10 настай Ө.Амар хүү “Эх оронч хүн гэж халаасандаа дандаа хогтой явдаг хүнийг хэлнэ” гэж хариулсан байна. Ингээд 600 хүүхдээс шалгарч, ДАШТ-ий талбайд гарсан анхны монгол хүү Ө.Амарын “Миний мөрөөдөл нэртэй” эссэг хүргэж байна. Би алдартай хөлбөмбөгчин болно гэдэгтээ огтхон ч эргэлздэггүй
Би алдарт Барселона багийн домогт тоглогч Лионель Месситай адил агуу хөлбөмбөгч болохыг мөрөөддөг. Яг үнэндээ Мессигээс ч илүү тоглогч болмоор байна. Мөрөөдөлдөө хүрэхийн тулд одооноос маш сайн хичээх хэрэгтэй гэдгийг сайн мэдэж байгаа. Хөлбөмбөг бол хичээл зүтгэл, хөдөлмөр, хөлс хүч, бэртэл, гэмтэл, цаг хугацаа гэх мэт маш их үнээр амжилтад хүрдэг спорт. Амжилт үнэгүй ирнэ гэж үгүй. Тэр тусмаа хөлбөмбөгийн спортод үнэгүй зүйл нэгээхэн ч үгүй. Хөлбөмбөг бол зөвхөн хууралт, цохилт, хамгаалалт, гоол, хожил гэсэн зүйл биш сонирхол, мэдрэмж, хөдөлмөр, хичээл зүтгэл, байнгын бэлтгэл сургуулилтын нийлбэр гэж би боддог. Би сонирхлынхоо дагуу байнга хичээллэж, мэдрэмжээ хөгжүүлж бүх бололцоогоо дайчлан хөдөлмөрч Монголынхоо нэрийг дэлхий дуурсгасан алдартай хөлбөмбөгчин болж мөрөөдлөө биелүүлнэ.
Месси анх 20 настайдаа Эл Классико-д хет трик хийж олонд танигдаж байсан. Эл Классико-д хет трик хийнэ гэдэг ховорхон тохиолдол.
Мөн амжилт, алдрын оргилд хүрэх оньс нь харилцааны соёл. Хэчнээн авьяастай чадварлаг тоглогч байсан ч гэсэн зан харилцааны доголдолтой бол өөрийн фанаттай болж чадахгүй. Фанат гэдэг бол тамирчны өөрийнх нь гэр бүлээс өөрцгүй зүйл. Ялахад нь хамт баярлаж, ялагдахад нь хамт уйлж, сэтгэл зүрхээрээ хамт байдаг үнэнч хүмүүсийг фанат гэнэ. Тэр тусмаа хөлбөмбөгийн фанатууд хамгийн үнэнч фанатууд байдаг. Хөлбөмбөгчин хүнд авьяас чадвар, мэдрэмж, хичээл зүтгэл, тэсвэр тэвчээр, өндөр ухамсар, харилцааны соёл гээд энэ бүгд яг л эд эрхтэн шиг хамт байх ёстой.
Энэ бүхнийг дэлхийн таван удаагийн шилдэг хөлбөмбөгийн Месси бүрэн цогцлоосон хүн. Би хааяа боддог. Месси манай гарагийн хүн мөн болов уу гэж. Та ч гэсэн хөлбөмбөг үздэг бол Мессигийн тоглож байгааг, гоол хийж буй агшныг харвал надтай адил бодох байх аа.
Миний мөрөөдлийг биелүүлэхэд туслах хамгийн эхний шат бол манай сургуулийн хөлбөмбөгийн “Шинэ монгол” клуб. Би энэ шатаар зогсолтгүй дээшээ маш хурдтайгаар өгсөх болно.
Би сургуулийнхаа хөл бөмбөгийн багт хагас хамгаалагчийн байрлалд тоглодог. Хагас хамгаалагчийн байрлал бол хамгийн гоё байрлал. Хамгаална бас довтолно.
Манай баг хоёр жил дараалан "Дуулиан 2020"-д оролцсон. Би хоёр тоглолтод нэг гоол оруулсан. Багийнхаа тоглолтод сэтгэл дундуурхан байгаа. Ирэх жилээс манай багийнхан улам хичээж, "Дуулиан 2020"-д түрүүлнэ гэдэг би итгэлтэй байна.
Би алдартай хөлбөмбөгчин болно гэдэгтээ огтхон ч эргэлздэггүй. Бас хэзээ ч энэ мөрөөдлөөсөө ухарч шантрахгүй. Би мөрөөдлөө биелүүлж чадна гэдэгтээ урам зориг, эрч хүч, итгэл найдвараар дүүрэн байна. Би энэ жилийн эмэгтэйчүүдийн баяраар сургуулийнхаа “Ээждээ бичих захидал” уралдаанд алдартай хөлбөмбөгийн болоод TOYOTA-ийн LEXUS 1070 машины рекламд тоглох гэрээ хийсэн гэж мөрөөдсөн. Ээждээ захидал бичих уралдаанд түрүүлэхэд миний ээж маш их баярлаад, уйлсан.
Тэгвэл одоо загвар, хурд хүчний гайхамшиг бол аюулгүй байдлыг дээд зэргээр хангасан тансаг зэрэглэлийн KIA автомашины рекламд тоглоно гэсэн мөрөөдөл надад нэмэгдлээ. Ингээд би гуравдугаар ангийн сурагч байхдаа бичсэн шүлгээр энэхүү эссэгээ төгсгөе.
Би хөлбөмбөгчин болохыг мөрөөддөг
Ногоон талбайд дураараа гүйсэн
Суарес шиг гоё дамжуулдаг
Месси шиг олон гоол оруулдаг
Неймар шиг сайн довтолдог
Дэндүү сайн хөлбөмбөгчин болно би...
