Монгол Улсын Ерөнхийлөгчийн найм дахь удаагийн ээлжит сонгуулийн сурталчилгаа дөрөв дэх өдрөө үргэлжилж байна. Энэ удаагийн сонгуулийн сурталчилгаа 14 хоног үргэлжлээд дуусна. Сурталчилгааны хугацааны хувьд өмнөх сонгуулиудаас бага, дээр нь цар тахалтай нөхцөл байдалд явагдаж байна. Гэсэн хэдий ч Ерөнхийлөгчид нэр дэвшигчид 21 аймаг, нийслэлийн есөн дүүргийн иргэд, сонгогчидтой уулзах зорилт тавьжээ. 

Өчигдрийн байдлаар МАН-аас нэр дэвшигч У.Хүрэлсүх  Хэнтий, Дорнод, Сүхбаатар, Ховд, Увс, Баян-Өлгий аймаг болон нийслэлийн Хан-Уул, Баянзүрх дүүргийн иргэд сонгогчидтой уулзалтаа хийгээд байна. Харин АН-аас нэр дэвшигч С.Эрдэнийн хувьд Хэнтий, Дорнод аймгийн иргэд сонгогчидтой уулзсан бол "Зөв хүн электорат" эвслээс нэр дэвшигч Д.Энхбат Хөвсгөл, Баянхонгор, Ховд аймгийн иргэд сонгогчидтой уулзаж, мөрийн хөтөлбөрөө танилцуулжээ. Нэр дэвшигч Д.Энхбатын хувьд нэр дэвшигч С.Эрдэнээс нэг аймгаар түрүүлж явна. МАН-ын нэр дэвшигч У.Хүрэлсүх нөгөө хоёр нэр дэвшигчээсээ бараг гурван дахин их хурдтайгаар уулзалт, сурталчилгаагаа хийж байгаа харагдана. Өдөрт 2-3 аймаг, нэг дүүрэгт ажиллаж байгаа бол нөгөө хоёр нэр дэвшигч өдөрт 1-2 аймагт ажиллах байх жишээтэй. 

Судалгааны “МEC” төв 2021 оны Ерөнхийлөгчийн ээлжит сонгуулийн тандалтын судалгааг танилцуулжээ. Судалгааг 2021 оны тавдугаар сарын 17, 18, 20-нд  Улаанбаатар болон хөдөө орон нутгийн 2000 хүний дунд явуулсан аж. Энэ нь сонгуулийн сурталчилгаа эхлээгүй байхад иргэдтэй утсаар холбогдон тандалтаар авсан судалгаа юм байна. 

Судалгаанд оролцсон нийт иргэдийн 44 хувь МАН-аас нэр дэвшигч У.Хүрэлсүхийг дэмжсэн бол гурван хувь нь АН-аас нэр дэвшигч С.Эрдэнийг, 10 хувь нь "Зөв хүн электорат" эвслээс нэр дэвшигч Д.Энхбатыг,  8 орчим хувь нь  цагаан сонголт хийнэ, 35 хувь сонголтоо хараахан хийж амжаагүй байна гэсэн судалгааны үр дүн гарчээ. 

Судалгааны багийнхан МАН-аас нэр дэвшигч У.Хүрэлсүхийг нийт иргэдэд танигдсан байна гэж дүгнэжээ. У.Хүрэлсүх иргэдэд танигдахад Ерөнхий сайдаар таван жил ажилласан нь нөлөөлсөн, хийсэн том ажлуудтай, мөн хувь улстөрчийн зоримог, шийдэмгий харизм нь иргэдэд таалагдаж байна. Иргэд ч тогтвортой байдлыг хүсч МАН-аас нэр дэвшигчийг дэмжих магадлал байна гэж дүгнэхэд хүрчээ.

Харин АН-аас нэр дэвшигч С.Эрдэнийг маш цөөхөн хүн дэмжиж байгаа нь АН доторх  хуваагдал нөлөөлж байна гэж дүгнэжээ. Сонголтоо хийж амжаагүй байгаа иргэдийн дийлэнх нь АН-ыг дэмждэг ч нэр дэвшигч С.Эрдэнийг дэмжихгүй байгаа дүр зураг ажиглагдсан байна.  

Нэр дэвшигч Д.Энхбатын хувьд өмнө нь парламентын гишүүнээр дөрвөн жил ажилласан ч иргэдэд танигдах ажил хийгээгүй, олон нийтэд өөрийгөө хангалттай таниулж чадаагүй байна гэж дүгнэсэн аж. Түүнийг сонгуулийн сурталчилгааны 14 хоногт ч өөрийгөө иргэдэд бүрэн таниулж чадахгүй, хүчтэй өрсөлдөгч болох түвшинд хүрэхгүй гэж таамаглажээ. 

Судалгаанд оролцогчдын 35 хувь нь буюу нэлээд өндөр хувь нь хараахан сонголтоо хийгээгүй байгаа гэж хариулсан. Эдгээр сонгогчид цагаан сонголт хийх магадлал өндөр байгаа аж. Учир нь, АН-ын хуваагдлаас болж тус намыг дэмждэг олон иргэд сонгогчид цагаан сонголт хийхэд хүрнэ гэжээ. Үндсэндээ АН-аас нэр дэвшигч С.Эрдэнийн рейтинг цагаан сонголтоос ч бага байгаа юм. Хэрвээ сонголтоо хийгээгүй иргэд цагаан сонголт руу шилжвэл сонгуулийн дүнгээр С.Эрдэнэ цагаан сонголтоос цөөхөн санал авах магадлал хамгийн өндөр байна.

"MEC"-гийн зүгээс сонгуулийн ирц хэн ялахад чухал нөлөөтэй гэдгийг онцолсон. Учир нь сонгуулийн ирц өндөр байвал дахин сонгууль болох магадлалтай. Харин ирц бага байвал нэр дэвшигч У.Хүрэлсүх ялах, хамгийн өндөр санал авах магадлалтай гэж "MEC" судалгааны байгууллагын захирал Л.Золбаатар мэдээлэв.