Монголын хүүхдийн зохиолчдын холбооны тэргүүн, дэд профессор, хүүхдийн зохиолч  Н.Энхтайвантай хүүхдэд ном уншуулах дадал зуршлыг хэрхэн бий болгох тухай ярилцлаа.

-Хүүхдийг хэдэн настайгаас нь эхлэж ном уншиж өгөх бэ. Ном уншиж өгөх нь  ямар ач холбогдолтой юм бэ?

-Хүүхэд бол хүн төрөлхтөний ирээдүй юм. 21-р зуунд аливаа улс орон, хүүхэд өсвөр үеийнхээ хөгжилд илүү их анхаарал тавих болсон  байна. Хүн болгон хүүхдээ эрүүл саруул бие бялдартай, оюун ухаан, сэтгэхүйн өндөр хөгжилтэй болгохыг эрхэмлэдэг. Энэ нь ч зөв энэхүү хөгжлүүд нь хүний хөгжлийн үндсэн хөгжил юм. Үндэсний бичиг үсэг, хэл соёл, ёс заншил, уламжлалаа эрхэмлэдэг  болгон төлөвшүүлэх, ач холбогдолыг соён гэгээрүүлэх, тэр тусмаа хүүхдийг хүн болгон төлөвшүүлэхэд  уран зохиол, урлагийн  нөлөө асар их. Хүн байхын мөн чанарыг уран зохиолоор дамжуулан авдаг. Олон эрдэмтэн, судлаачид хүүхдийг эхийн хэвлийд байхаас нь үлгэр уншиж, хөгжим сонсгосноор өсөлт, хөгжилд нь эерэгээр нөлөөлдөг гэж үздэг. Манай монголчууд ч эрт дээр үеэсээ хүүхдэдээ бүүвэйн дуу аялж, оньсого, зүйр цэцэн үг, сургаалиар сургаж, үлгэр тууль ярьж, сургаж, хүмүүжүүлж ирсэн уламжлалтай ард түмэн. Хүүхдийн оюун ухааныг сургуулийн өмнөх наснаас нь эхэлж хөгжүүлэх хэрэгтэйг  олон улсын эрдэмтэд, сэтгэл зүйчид  зөвлөдөг хүүхдийнхээ оюун ухааны хөгжилд багаас нь анхаараагүй тохиолдолд тухайн хүүхдийн бие махбодийн төдийгүй сэтгэх чадвар, танин мэдэхүйн хөгжил удаашрах аюултайг судлаачид анхааруулсан байдаг. Багадаа ном уншуулж, үлгэр яриулж үзээгүй, ном уншиж өсөөгүй хүүхэд ирээдүйд эцэг эх болохдоо хүүхдүүддээ хэрхэн үлгэрлэж чадах вэ  гэдгийг байнга санах хэрэгтэй. Амьдралын зөв дадал хэвшил гэдэг зөвхөн та болон таны үр хүүхдэд биш тэдний үр хойчид хүртэл сайнаар нөлөөлдөг зүйл юм. Харин бид хүүхдүүддээ “Ном унших дадал зуршлыг” амьдралд нь бий болгох, үүгээрээ дамжуулан төлөвшихөд туслах хэрэгтэй. Хүүхэд бүрийг тэс өөр нэг ертөнц гэж үзэж болно. Учир нь хүүхэд бүрийн дур сонирхол өөр, авьяас чадвар нь ч харилцан адилгүй байдаг. Тиймээс бид хүүхдийнхээ нас сэтгэхүйн онцлогт тохирсон номыг  авч өгвөл зүгээр. Үүний үр дүнд хүүхдүүд маань өөрсдөдөө өдөр бүр ном уншихад зориулсан тодорхой хугацааг гаргаж чадах бөгөөд энэ нь цаашлаад бидний хүсээд байгаа “Амьдралын зөв дадал” нь болох юм.  Бага насны хүүхдийн оюун сэтгэхүйд илэрхий сайнаар нөлөөлдөг нэг зүйл бол түүнд ном уншиж өгөх юм. Хүүхдэд ном уншиж өгөх нь яагаад тийм чухал вэ, ном уншихын ач холбогдол юу вэ гэвэл хүүхдийн оюун ухааны чадварыг дээшлүүлж байгаа юм. Иймд хүүхдийг номонд дуртай болгох, ном уншихыг тэдний амьдралын энгийн дадал хэвшил болгоход чиглэсэн үйл ажиллагааг ээж аавууд гэр бүлийн нөхцөлд байнга хэрэгжүүлэх нь үр дүнгээ өгдөг. Энэ нь хүүхдийн сэтгэхүйг хөгжүүлээд зогсохгүй, түүний мэдлэгийг нэмэгдүүлэх, чадварыг дээшлүүлэх, зан суртахууныг цэвэр ариун байлгах, түүний авьяас чадварыг нээж өгөхөд  нөлөөлдөг.