Одоогийн захирал Ганхуягийг эс тооцвол “Эрдэнэс-Тавантолгой”-н өмнөх захирлууд бүгд хуулийн асуудалд холбогдсон. Зарим нь хоригдсон, зарим нь оргон зайлаад одоо болтол эх орондоо ирж чадахгүй яваа. Үүн шиг үе, үеийн захирлууддаа халгаатай, төрийн өмчит дараагийн байгууллагаар Хөгжлийн банк тодорч байна.

Тус банкийг 11 жилийн өмнө үндэсний хэмжээний том /мега/ төслүүдийг санхүүжүүлж, эдийн засгийн тогтвортой байдлыг хангах тусгай чиг үүрэгтэй байгуулж байв. Харамсалтай нь, байгуулагдсан цагаасаа бүлэглэл, улстөрчдийн бэлэн мөнгөний АТМ, Засгийн газрын кассын машин болж ирснийг энэ өдрүүдийн үйл явдал харуулж байна. Улстөрчдийн нөлөө хэтэрхий их орсны золиосонд өнөөдөр үе, үеийн гүйцэтгэх удирдлагууд нь хоригдов. Хөгжлийн банк 2012 оноос хойш зургаан гүйцэтгэх захирлын нүүр үзэж, тэднийг дахин гэмт хэрэг үйлдэж болзошгүй гэдэг үндэслэлээр шүүхээс цагдан хорьж, бас хорьж магадгүй нөхцөл байдал бүхий хуулийн болон улс төрийн  хайчин дунд оржээ.

1. Гүйцэтгэх захирал Н.Мөнхбат /2012-2016 он/

Тухайн үед /2012 он/ Эдийн засгийн хөгжлийн сайдаар ажиллаж байсан Н.Батбаяр гадаадын шилдэг банкинд ажиллаж байсан залууг Монголдоо авчирч, шинэхэн байгуулсан Хөгжлийн банкны гүйцэтгэх захирлаар томилсон нь Н.Мөнхбат байв. Тэрээр хамгийн их мөнгөтэй үед ажилласан захирал. Чингис, Самурай бондыг босгож, дийлэнхийг нь Хөгжлийн банк захиран зарцуулсан үе юм. Түүнийг захирлаар ажиллаж байхдаа олгосон зээлүүдтэй нь холбож дахин шалгаж эхэлсэн. Өмнө нь уг асуудлаар цагдан хоригдсон ч шүүхээс хэргийн хөөн хэлэлцэх хугацаа дууссан шалтгаанаар хаасан байв. Гэсэн ч дахин хэрэг үүсгэсэн бөгөөд өнөөдөр цагдан хорих эсэх шүүх хурал болно.

2. Гүйцэтгэх захирал Б.Батбаяр /2016-2019/

Сангийн яаманд олон жил ажилласан туршлагатай Д.Батбаярыг Хөгжлийн банкны гүйцэтгэх захирал болгосон. Б.Батбаярын үед Хөгжлийн банкны хуулийг шинэчлэн баталсан ч зээлийн чанар сайжраагүй. Шүүхээс Б.Батбаярыг өнгөрсөн баасан гаригт цагдан хорихоор шийдсэн. Түүнийг ажиллаж байх хугацаанд олгосон зээлүүдтэй холбон шалгаж байгаа бөгөөд дахин гэмт хэрэг үйлдэж болзошгүй гэх үндэслэлээр хориод байна. Түүнийг хамт ажиллаж байсан дэд захирал асан Ч.Мөнхбаярын хамт цагдан хорив.

3. Гүйцэтгэх захирал Г.Амартүвшин /2019.05-2019.12.31/

Шарк танк нэвтрүүлгээр олонд нэлээд танигдсан Г.Амартүвшинг Хөгжлийн банкны захирлаар тавихад нийгэм эерэг хүлээж авсан. Дэлхийд нэр хүндтэй ABN AMRO, Монголын Хас зэрэг банкуудад удирдах алба хашиж байсан түүнийг Хөгжлийн банкийг арай өөрөөр удирдана гэж харж байсан ч талаар болсон. Тэрээр зургаахан сар ажиллаад УИХ-ын сонгуульд нэр дэвшиж, өнөөдөр гишүүн яваа. Харин түүний хамаарал бүхий компани Хөгжлийн банкнаас зээл авсан нь ёс зүйн болон албан тушаалын давуу байдлаа урвуулан ашигласан байх хардлагыг төрүүлж буй. Үүнтэй нь холбоотойгоор хууль хяналтын байгууллага мөн шалгаж буй. УИХ-д хамт сонгогдсон Х.Ганхуяг, Г.Дамдинням нартай хамтарч 33 тэрбумаар зээл авсан нь албан утшаалын давуу эрх болж, тэд гурвуулаа УИХ-д сонгогдсон МАН-аасаа түдгэлзэх сануулгыг урьдчилсан байдлаар аваад байна. Г.Амартүвшингийн тухайд 2020 оны сонгуулийн өмнө нам бусаас МАН-д, харин Х.Ганхуяг мөн сонгуулийн өмнөхөн  АН-аас МАН-д элссэн юм. 

4. Гүйцэтгэх захирлын үүргийг түр орлон гүйцэтгэгч Б.Энхбат /2020.01-2020.04/

Г.Амартүвшин ажлаа өгсны дараа таван сар орчмын хугацаанд Хөгжлийн банкны тэргүүн дэд захирал Б.Энхбат гүйцэтгэх захирлын үүргийг гүйцэтгэсэн. Түүнийг мөн гэмт хэрэг үйлдэж болзошгүй гэх үндэслэлээр цагдан хориод байна.

5. Гүйцэтгэх захирлын үүргийг түр орлон гүйцэтгэгч Н.Мөнхсүх /2020.04-2021.08/

Тус захирал нь Сангийн яаманд олон жил ажилласан туршлагатай. Хөгжлийн банкинд чимээгүй ажиллаж байгаа өөрийн хүсэлтээр ажлаа өгөөд явсан. Магадгүй улс төрчидтэй хутгалдсан энэ газраас бараг зугтаад явсан байх. Түүнтэй холбоотой хэрэг бүртгэлт, зээлийн асуудал үүсээгүй байгаа.

Зургаа дахь нь одоогийн захирал М.Мандуул юм.