С.Зориг агсны амь насыг хөнөөсөн хэргээр хаалттай хорих ангид 20 жилийн хорих ял оноосон Б.Содномдаржаа, Т.Чимгээ, Ц.Амгаланбаатар нарт холбогдох хэргийг задалж, дахин хэрэг хянан шийдвэрлэх ажиллагаа явуулах прокурорын санал үндэслэлтэй эсэхийг хэлэлцэх шүүх хурал Улсын дээд шүүх хурал дуусч, шийдвэрээ гаргажээ.
Ингэхдээ Б.Содномдаржаа, Т.Чимгээ нарыг батлан даалтад гаргах шийдвэр гаргасан байна.
Дээд шүүхийн албан мэдээ:
Улсын Дээд шүүхийн хяналтын шатны эрүүгийн хэргийн шүүх хуралдаанаар Ц.Амгаланбаатар, Т.Чимгээ, Б.Содномдаржаа нарт холбогдох хэргийг прокурорын дүгнэлтийг үндэслэн 2021 оны 5 дугаар сарын 14-ний өдөр хянан хэлэлцлээ.
Хуралдаанаас шинээр илэрсэн нөхцөл байдлыг хянуулах тухай прокурорын дүгнэлтийг хүлээн авч, Сүхбаатар дүүргийн Эрүүгийн хэргийн анхан шатны шүүхийн 2016 оны 12 дугаар сарын 27-ны өдрийн 3 дугаар шийтгэх тогтоол, Нийслэлийн Эрүүгийн хэргийн давж заалдах шатны шүүхийн 2017 оны 3 дугаар сарын 14-ний өдрийн 171 дүгээр магадлал, Улсын дээд шүүхийн хяналтын шатны эрүүгийн хэргийн шүүх хуралдааны 2017 оны 8 дугаар сарын 4-ний өдрийн 185 дугаар тогтоолыг тус тус хүчингүй болгож, хэргийг сэргээн шалгахаар прокурорт буцааж шийдвэрлэв. Хэргийг прокурорт очтол Т.Чимгээ, Б.Содномдаржаа нарт хувийн баталгаа гаргах таслан сэргийлэх арга хэмжээ авахаар шийдвэрлэж, Ц.Амгаланбаатар нь өөр хэрэгт хорих ял шийтгүүлсэн шүүхийн хүчин төгөлдөр тогтоол байгааг дурдлаа.
Шүүхээс С.Зориг агсны амь насыг хөнөөсөн хэргээр 20 жилийн хорих ял авсан Т.Чимгээ, Б.Содномдаржаа нарыг яллагдагчаар татан шалгах явцдаа эрүүдэн шүүсэн гэх үндэслэлээр ТЕГ-ын дарга асан Б.Хурц, Ерөнхий прокурорын орлогч Г.Эрдэнэбат нарт ял оноосон билээ.
Дээр дурдсан шинэ нөхцөл байдал үүссэнтэй холбоотойгоор С.Зориг агсны амь насыг хөнөөсөн хэргийн эцсийн шатны шүүхийн шийдвэрийг Эрүүгийн хэргийн хянан шийдвэрлэх тухай хуульд заасан үндэслэлээр хүчингүйд тооцож, дахин хэрэг хянан шийдвэрлэх ажиллагаа явуулах дүгнэлтийг Улсын ерөнхий прокуророос Улсын дээд шүүхэд хүргүүлээд байгаа юм.
С.Зориг агсны амь насыг хөнөөсөн хэргээр хаалттай хорих ангид 20 жилийн хорих ял оноосон Б.Содномдаржаа, Т.Чимгээ, Ц.Амгаланбаатар нарт холбогдох хэргийг задалж, дахин хэрэг хянан шийдвэрлэх ажиллагаа явуулах прокурорын санал үндэслэлтэй эсэхийг хэлэлцэх шүүх хурал Улсын дээд шүүхэд эхэллээ. Өмгөөлөгчдийн зүгээс шүүгчдээс татгалзсан санал гаргасан ч шүүх бүрэлдэхүүн хүлээж аваагүй, хуралдаан үргэлжлэхээр болсон юм.
Сүхбаатар дүүргийн Эрүүгийн хэргийн анхан шатны шүүхийн 2016 оны 12 дугаар сарын 27-ны өдрийн 03 дугаар шийтгэх тогтоол, Нийслэлийн Эрүүгийн хэргийн давж заалдах шатны шүүхийн 2017 оны 03 дугаар сарын 14-ний өдрийн 171 дүгээр магадлал, Улсын дээд шүүхийн хяналтын шатны эрүүгийн хэргийн шүүх хуралдааны 2017 оны 08 дугаар сарын 04-ний өдрийн 185 дугаар тогтоолтой, Ц.Амгаланбаатар нарт холбогдох хэргийг прокурорын бичсэн дүгнэлтийг үндэслэн хаалттай хянан хэлэлцэнэ.
/2002 оны Эрүүгийн хуулийн тусгай ангийн 91 дүгээр зүйлийн 91.2.1, 91.2.4, 91.2.6, 91.2.10, 91.2.11, 91.2.12, 91.2.13, 91.2.15, 91.2.16/
