ТЕГ-аас Цагдаагийн харьяа дотоодын цэргийн штабын дарга, генерал С.Ганбатыг баривчилж, 461-р ангид цагдан хорьсон. Түүнийг төрийн нууц задруулсан, хууль бусаар гүйцэтгэх ажиллагаа явуулсан, үндэслэлгүйгээр хөрөнгөжсөн гэх зэрэг үндэслэлээр шалгаж байгаа аж.

Тэгвэл генерал С.Ганбатын гэрээс 500 мянган ам.доллар бэлнээр, 50 орчим бууны төрлийн галт зэвсэг, төрийн нууцад хамааралтай байж болох зарим материалууд, тагнаж чагнах зориулалт бүхий төрийн данстай төхөөрөмжүүд олдсон гэх мэдээлэл гараад байгаа.

Тэрээр Эрүүгийн цагдаагийн газрын туслах төлөөлөгчөөр ажлын гараагаа эхэлж тус газрын дарга болтлоо дэвшин ажилласан. Мөн Хонконг дахь Ерөнхий консулын газарт зөвлөх консул зэрэг албыг хашиж байсан. Тэрээр оффшор бүст данстай хүмүүсийн нэг, төсвийн хөрөнгийг хувьдаа завшсан, албаны эрх мэдэл, албан тушаалын байдлаа хувийн зорилгод урвуулан ашигласан гэх асуудалд холбогдож байжээ.  Улс төрийн хүрээнд түүнийг УИХ-ын дарга Г.Занданшатар, Ерөнхийлөгч асан Х.Баттулга нарын ойрын хүн гэж ярьдаг. 

Дашрамд дурдахад, С.Ганбатын хүү Пүрэвсүрэн Монголбанкны Тамгын газрын захирлын үүрэг гүйцэтгэгчээр ажилладаг байна. Монголбанк УИХ-ын харьяа байгууллага бөгөөд Монголбанкны Ерөнхийлөгчийг УИХ-аас томилж, чөлөөлдөг билээ. Г.Пүрэвсүрэн энэ онд тус албан тушаалд томилогдсон бөгөөд өмнө нь Монгол Улсын Хөгжлийн банк, “Ди Би Эм Лизинг” ХХК, Гүйцэтгэх захирлаар ажиллаж байжээ.