2020 оны УИХ-ын ээлжит сонгуульд бие даан нэр дэвшигч Н.Номтойбаярыг шүүхээс түр хорих шийдвэр гаргасан. Тиймээс тэрээр өнөөдөр өөрийн биеэр ирж нэр дэвшигчийн үнэмлэхээ гардан авах боломжгүй болсон учраас түүний аав Б.Нямтайшир хүүгийнхээ нэр дэвшигчийн үнэмлэхийг СЕХ-оос гардан авлаа.

Б.Нямтайшир хүүгийнхээ нэр дэвшигчийн үнэмлэхийг гардан авсны дараа хэвлэлд мэдээлэл өгсөн юм.

Тэрээр “Миний хүү Номтойбаяр УИХ-ын 29 дүгээр тойрогт нэр дэвшсэн. Харамсалтай нь өөрийн биеэр үнэмлэхээ гардан авах боломж олдсонгүй. СЕХ-оос 587 дугаар дугаартай нэр дэвшигчийн үнэмлэхийг нь би сая гардан авлаа. Би эцэг хүний хувьд хэдэн үг хэлье гэж бодож байна. Нэн тэргүүнд Монгол Улсад үйлчилж байгаа хууль тогтоомжийн хүрээнд шударга ажилласан СЕХ-ны дарга, гишүүдэд талархал илэрхийлье. Анх удаа хүний эрхийг зөрчөөд нэр дэвшигчийн тогтоолоо гардан авсны дараа цагдан хорих шийдвэрийг шүүх гаргасан. Энэ нь Сонгуулийн тухай хуулийн 35.2 дахь заалтыг зөрчсөн үйлдэл болсон. Харамсалтай нь ардчилсан нийгэмд анх удаа төрийн эрх барих дээд байгууллагад нэр дэвшигч шоронгоос өрсөлдөх болж байна. Энэ нь зөвхөн түүний эрх чөлөөг боймлоод зогсохгүй Хан-Уул дүүргийн 120 гаруй мянга иргэний сонгох эрхэд халдаж байгаа үйлдэл болж байна. Эрх мэдэлтний үгийг хууль мэт ойлгож, түүнийг хэрэгжүүлдэг гажуудал Монголын нийгэмд тогтсон байна. Ардчилсан улс оронд ийм зүйл байдаггүй, байх ч ёсгүй. Шүүх засаглал нь бие даасан хараат бус, ёс зүйтэй байх ёстой. Монгол Улсад үгээр нь яваагүй намын гишүүнээ, үнэн төрхийг нь шударгаар илчилсэн иргэнээ, төрдөө хоёргүй сэтгэлээр зүтгэсэн хүнээ барьдаг хорьдог, ял өгдөг жишиг нэгэнт тогтжээ. Хэлмэгдүүлэлт ямар их гай зовлон авчирдгийг Монголын ард түмэн мэднэ. Би энэ хэлмэгдүүлэлт 20-р зуунтай дуусгавар болсон гэж бодож байсан. Гэтэл шинэ цагийн хэлмэгдүүлэлт эхэлж байгаа юм байна. Нэр дэвшигчийн үнэмлэхийг гардан авсан учраас Рэнцэнхорол шүүгч шийдвэрээ эргэн харна гэж бодож байна. Хэрэв улс төрийн зорилгоор суллахгүй бол би эцэг хүний хувьд түүний дуу хоолой болж, онгуулийн кампанит ажилд нь идэвхийлэн оролцоно. Миний хүүг дэмжсэн, дэмжиж байгаа Хан-Уул дүүргийн иргэдэд талархаж байна.

Монголын түүхэнд анх удаа нэр дэвшигчийн тогтоолоо авсан байхад цагдан хорьсон. Энэ бол шууд хууль зөрчсөн үйлдэл болсон. Би эцэг хүний хувьд, хуулийн байгууллагад ажиллаж байсан хүний хувьд үүнийг улс төрийн зохиомол хэрэг гэж бодож байна" гэлээ. 

Дашрамд дурдвал, Н.Номтойбаярыг шүүх хурлыг энэ сарын 26-нд буюу сонгуулийн санал хураалтын дараа явуулахаар товлон зарлаад байгаа юм.