Төрийн албаны шинэтгэл эдийн засгийн агуулгатай болж байгаа аж. Цалингийн нэгдсэн системийг бүрдүүлж, төрд учруулсан хохирлыг нөхөн төлүүлэх үйл ажиллагаа нь энэ чиглэлээр хийгдэж буй томоохон ажлууд юм.

Цалингийн нэгдсэн системийг нэвтрүүлэх ажлын хүрээнд 4200 төсвийн байгууллагын 198000 гаруй төрийн албан хаагчдыг хамруулж, цалинг нэгдсэн системээр авах ажлын явц, цаашид анхаарах асуудлын талаар Төрийн албаны зөвлөл дээр хэлэлцүүлэг зохион байгууллаа.

Цалингийн нэгдсэн систем нь Төрийн албаны зөвлөлийн Хүний нөөцийн удирдлагын системээс үндсэн өгөгдөл датагаа авах бөгөөд Монгол банк, Сангийн яам, Татварын ерөнхий газар, Нийгмийн даатгалын ерөнхий газар, Үндэсний дата төвийн системүүдтэй автоматаар мэдээлэл солилцож үйл ажиллагааг хөнгөвчлөхийн зэрэгцээ ил тод, нээлттэй байдлыг хангах юм.

Хүний нөөцийн удирдлагын систем болон цалингийн нэгдсэн системийн сургагч багш бэлтгэх сургалтыг цахим хэлбэрээр зохион байгуулж, 2020 оны 8 дугаар сарын байдлаар чатбот, дуудлагын утас, цахим шуудангаар төсвийн байгууллагуудад зөвлөгөө дэмжлэг өгснөөр 21 аймгийн 3112 төсвийн байгууллага амжилттай холбогдож цалин хөлсний тооцоолол хийж гүйцэтгээд байна.

Нийслэл Улаанбаатар хотод  үйл ажиллагаа явуулж байгаа улсын болон орон нутгийн төсвийн байгууллагуудын Хүний нөөцийн удирдлагын системд оруулсан мэдээллийг шинэчилж цалингийн нэгдсэн системд холболт хийх ажлыг хуваарийн дагуу 2020 оны 8-10 дугаар сард багтаан үе шаттайгаар хийж гүйцэтгэнэ.

Энэхүү ажлыг төрийн албаны цалингийн нэгдсэн систем нэвтрүүлэх тухай Засгийн газрын 2020 оны 163 дугаар тогтоолыг хэрэгжүүлэх цогц арга хэмжээтэй уялдуулан хийж байгаа юм.