Нүүрсний хулгайн хэрэгт холбоотой хүмүүсийн нэрийг зарлахыг шаардсан жагсаал Төв талбайд дөрөв дэх өдрөө үргэлжилж байгаа бөгөөд өнөөдөр Ерөнхий сайд Л.Оюун-Эрдэнэ, ЗГХЭГ-ын дарга Д.Амарбаясгалан, Хууль зүй дотоод хэргийн сайд Х.Нямбаатар нар гарч ирж жагсагчидтай уулзлаа. Уулзалтын үеэр нүүрсний хулгайн эздийг шалгах ажлын хэсэг байгуулж иргэдийн төлөөллөөс 100 хүртэлх хүнийг оруулахаар болсон байна.

Ерөнхий сайд Л.Оюун-Эрдэнэ: Засгийн газар нүүрсний хулгайг илчилж гаргаж ирсэн. Бид энэ асуудлыг зүгээр орхихгүй үр дүнд хүргэхээр ажиллах болно. Хамгийн гол нь бид эвлэлдэн нэгдэх хэрэгтэй байна. Ингэж чадахгүй бол бид хамтдаа нүүрсний хулгайн эздэд ялагдах болно. Би Монгол Улсын ирээдүй тийм байгаасай гэж хүсэхгүй байна. Ард иргэд Засгийн газартаа дэм болж нүүрсний хулгайч нартай тэмцэхийг уриалж байна. Энэ зам тийм амар биш, маш олон захиалгатай ажиллагаанууд болж байгаа учир өнөөдөр тэдгээр хүмүүсийн идэш болж болохгүй.  Өнөөдөр шүүх дээр маш олон хэргүүд гацаж байгаа. Үүнийг бид шахах ёстой. Ард иргэд маань биднийг ойлгож шударга ёсны төлөө хамт байж, нүүрсний хулгайн эздийг илчилнэ гэдэгт Ерөнхий сайдын зүгээс маш их итгэж байна. Хэрвээ бид өнөөдөр бууж өгвөл энэ бүх ажиллагаа зогсох тул хэн нэгний ятгалгад оролгүй эндээ бид хамт байх учиртай.

30 жилийн хугацаанд завхарсан тогтолцоог гуравхан сарын дотор шийдэж чадахгүй учир хамтдаа байж, нүд завчилгүй хууль хяналтын байгууллагыг хянацгаая. Бид ордон дотроос та бүхэн ордны гадан талаас нь шахаж ажиллая" гэлээ.