УИХ-ын чуулганы ээлжит хуралдаан эхэллээ. Өнөөдрийн хуралдаанд УИХ-ын 18, 28 дугаар нөхөн сонгуулиар олонхийн санал авч УИХ-ын гишүүнээр сонгогдсон Э.Батшугар, Ц.Идэрбат нар тангараг өргөлөө.

Нөхөн сонгуулийн эхний санал хураалтыг аравдугаар сарын 10-нд зохион байгуулсан боловч ирц хүрээгүй. Тиймээс энэ сарын 16-нд нэмэлт санал хураалт зохион байгуулж 18 дугаар тойрог буюу Хэнтий аймагт МАН-аас нэр дэвшсэн Ц.Идэрбат 17264 санал авсан бол 28 дугаар тойрог буюу СХД-т МАН-аас нэр дэвшсэн Э.Батшугар 28537 санал авч УИХ-ын гишүүнээр сонгогдсон юм.

УИХ-ын гишүүний тангараг “Монгол Улсын Их Хурлын гишүүн би ард түмнийхээ элчийн хувьд нийт иргэн, улсын ашиг сонирхлыг эрхэмлэн, төрт ёс, түүх соёлынхоо уламжлалыг хүндэтгэж, Монгол Улсын Үндсэн хуулийг дээдлэн сахиж авлига ашиг сонирхлоос ангид байж, гишүүний үүргээ чин шударгаар биелүүлэхээ тангараглая. Миний бие энэхүү тангаргаасаа няцвал хуулийн хариуцлага хүлээнэ” хэмээн тангараг өргөв.

Нөхөн сонгуулийн хяналтын тооллогыг 100 хувь гараар тоолсон бөгөөд санал хураалтын дүнтэй таарсан гэдгийг СЕХ-ны дарга П.Дэлгэрнаран мэдээллээ.