Сэтгэл судлаач, сурган хүмүүжүүлэгч Дейл Карнеги “Яаж санаа зовохоо больж тайван амьдарч эхлэх вэ” номондоо уйтгар гунигт байдлыг 14 хоногийн дотор үгүй хийх Альфред Адлерийн жорыг санал болгож олон жишээ баримтаар баяжуулжээ. Энэ жор тун энгийн бөгөөд түүний санааг тоймлон хүргэе.
Орчин тойрныхондоо анхаарал тавь
Нэрт сэтгэл судлаач Альфред Адлер, “Миний зөвлөсөн жорыг хэрвээ та мөрдөж чадвал 14 хоногийн дотор уйтгар гуниг, сэтгэлийн зовлон шаналлаасаа илааршиж чадна” хэмээн өвчтөнүүддээ хэлдэг байжээ. Энэ жор бол ердөө “Өдөр болгон та хэн нэгэнд ямар нэгэн тааламжтай зүйл яаж хийх билээ гэж бодохыг хичээх” юм. Ойр тойрныхныгоо сонирхдоггүй хүн л амьдралдаа асар их бэрхшээлийг амсч эргэн тойрныхондоо хор хөнөөл авчирч байдаг гэж тэр үздэг байжээ. Чухамхүү иймэрхүү хүмүүсийн дундаас л өөдгүй гэсэн тодотголтой хүмүүс төрөн гардаг байна. Орчин тойрныхоо хүмүүсийн дунд ажиллаж чаддаг байх, хүнд талархаж чаддаг байх, хайр сэтгэл, гэр бүлийн түшиг тулгуур байх ёстой гэдэг шаардлага хүмүүсийн өмнө тавигддаг.
Харин Иелийн их сургуулийн профессор Уильяам Фелст хэрхэн, яаж гэдэг асуултад тодорхой хариулсан байна. Тэрээр хэлэхдээ, “Зочид буудал, дэлгүүр, үсчин зэрэг газруудад би явахдаа хүмүүст заавал нэг аятайхан үг олоод хэлчих гэж хичээдэг. Ялангуяа тухайн хүний ялгарах чинхүү үнэн, сайхан шинжийг олж тэмдэглэхийг хичээж, түүнийг үйлчилгээний машин биш хүн гэдгийг мэдрүүлэхийг зорьдог. Зарим дэлгүүрийн худалдагчийн үс үнэхээр сайхан засалттай бол түүнд хэлэх л хэрэгтэй.
Харин заримдаа үсчнээс өдөржингөө зогсоогоороо ажилладаг байх даа, яаж үсчин болсон юм бэ, мэргэжлээрээ хэр удаан ажиллаж байгааг нь асуудаг. Амьдралыг нь сонирхоход хүмүүс дуртай байдгийг би анзаарсан. Ачааг минь авчирч өгсөн тээшчинд баярлалаа гэж гарыг нь атгахад баярладаг. Зуны халуун өдөр хоолны цэс авчирч өгсөн зөөгчид “ийм халуун өдөр халуун гал зууханд ажиллах хэцүү байгаа байх даа” гэж хэлэхэд тэрээр эхлээд бухимдсанаа нэлээн сүүлд нь “өө бурхан минь. Улайсан зуухны дэргэд ажиллаж буй тогоочийг ойлгож буй анхны хүн та юм байна” гэж надад хэлж байсан. Негр тогоочийн зовлонг зорчигч ойлгож байгаад зөөгч талархаж байв. Би хүмүүстэй төмөр замын нэгэн эд анги шиг биш, амьд хүн шиг хандсан болохоор тэр шүү дээ. Хүн бүрт хүн ёсны анхаарал хэзээд хэрэгтэй байдаг. Сайхан нохой хөтөлсөн хүний нохойг нь магтаад өнгөрөхөд миний магтаал тэр хүний нохойгоо хайрлах хайрыг нэмэгдүүлэв үү гэмээр үнэнч андыгаа эрхлүүлээд үлддэг” гэжээ.
Ачаа зөөгчийн гарыг атган, рестораны үйлчлэгчийн зовлонг ойлгосноо илэрхийлж, хаа хамаагүй хүний нохойг магтан шагшиж байдаг ийм хүн баргар царайтай, сэтгэлийн зовууртай байж болох уу гэж та өөрөөсөө асуугаарай. Мэдээж үгүй шүү дээ. Сарнайн үнэр түүнийг бэлэглэж байгаа хүний гараас анхилдаг гэдэг зүйр үг бий. Өдөр болгон хэн нэгний нүүрэн дээр баяртай инээмсэглэлийг тодруулахаа сайн үйл бүтээхийг хичээгээд та үзээрэй. Бусдыг халамжлах нь сэтгэлийн зовуураас холдуулахаас гадна, шинэ найз нөхөдтэй болж, амьдралд баяр хөөрийг олж авахад тань тусална.
Бернард Шоугийн хэлснээр “Аз жаргалтай амьдрах боломж олдохгүй байгаад гомдоллон гасалж, шаналж, өвчин эмгэгээр гомдоллон бамбай хийдэг аминч үзэлтэн байхын оронд зорилготой, утга учиртай, ариун буянтай санаа бодлоор амьдралаа дүүргэн баяр баясгалантай байх хэрэгтэй” юм.
Сайн үйл гэдэг бол бусдын царайд баяртай инээмсэглэлийг төрүүлдэг аливаа үйлдэл билээ. Өдөр бүр сайн үйл хийж байдаг хүн өөрөө тэр сайн зүйлийнхээ нөлөөлөлд автдаг гэж Дейл Карнеги тайлбарлажээ. Учир нь сэтгэлийн зовуур, айдас гунигийн үндсэн шалтгаан болж байдаг өөрийнхөө тухай бодлыг бусдад баяр хөөр өгөх гэсэн хүсэл эрмэлзэл нь түрэн хөөдөг гэж тайлбарласан байна. Тиймээс та уйтгартай байдлыг даван гарч аз жаргалтай, инээмсэглэл дүүрэн байхыг хүсч байгаа бол 14 хоногийн турш хэн нэгэнд ямар нэгэн тааламжтай зүйл яаж хийх билээ гэж бодож, хичээгээд үзээрэй гэж Дэйл Карнеги зөвлөжээ.
