УИХ Үндсэн хуульд оруулах нэмэлт, өөрчлөлт оруулах хуулийн төслийг баталлаа. Хуралдаанд 63 гишүүн оролцсоноос 100 хувийн саналаар дэмжлээ. Харин сөрөг хүчин буюу АН-ынхан Үндсэн хуульд нэмэлт, өөрчлөлт оруулах хуулийн төслийн эцсийн санал хураалтад оролцоогүй юм.  Энэ удаагийн Үндсэн хуулийн нэмэлт, өөрчлөлтөөр 35 зүйл заалтад өөрчлөлт оруулсан бөгөөд 2000 оны долоон өөрчлөлтийг зассан юм.

Үндсэн хуульд нэмэлт, өөрчлөлт оруулах хуулийн төслийг өнгөрсөн зургадугаар сарын 6-нд УИХ-ын гишүүн Д.Лүнджээжанцан нарын 62 гишүүн өргөн барьсан билээ. УИХ зургаан сараас хойш хуулийн төслийг хэлэлцэж өнөөдөр баталлаа. Ийнхүү Монгол Улс Ардчилсан шинэ Үндсэн хуульдаа 19 жилийн дараа хоёр дахь удаагаа өөрчлөлт оруулсан түүхэн өдөр өнөөдөр тохиож байна. 

Энэ удаагийн өөрчлөлтөөр Ерөнхийлөгчийг зургаан жилээр нэг удаа сонгодог байх, Дээд шүүхийн шүүгчдийг 12 жилээр томилдог байх, Ерөнхий сайд болон танхимын дөрвөн сайд нь "давхар дээл"-тэй байх зэрэг өөрчлөлт хийлээ. Мөн УИХ-ын гишүүн Үндсэн хууль зөрчвөл эгүүлэн татах, УИХ-тай хариуцлага тооцож, хугацаанаас нь өмнө тараах, УИХ-ын хавар, намрын чуулганы ажлын хоногийг нэмэгдүүлэх заалтууд орж байна.  Үүнээс гадна шүүх засаглалд томоохон өөрчлөлтийг хийсэн юм. 

Харин АН-ын зөвлөлөөс тавьсан Ерөнхий сайд танхимаа бүрдүүлдэг байх, сонгуулийг холимог тогтолцоогоор явуулах гэсэн санал олонхийн дэмжлэг авч чадалгүй уналаа.