Монгол Улсын Консерваторийн хашаанд Боловсролын үнэлгээний төвийн байр барих гэж байгааг тус сургуулийн багш нар эсэргүүцэж, тайван жагсаал зохион байгуулсан юм. Жагсаалын дараа БШУ-ы сайд жагсагчдыг хүлээн авч уулзаж, шийдэлд хүрчээ. Энэ талаар БШУ-ы сайд Л.Энх-Амгалан энэ талаар мэдээлэл өглөө.

Тэрээр “Монгол Улсын Консерваторийг цаашдаа кампус хэлбэрээр хөгжүүлэх ерөнхий төлөвлөгөөг гаргасан. Монгол Улсын Консерваторийн газраар хулгайлагдсан байсныг бид буцаан авчирч энэхүү төлөвлөгөөнд тусгаад байна. Нийт 2.6 га газрыг Монгол Улсын Консерватори эзэмшдэг. Үүний 0.3 га газарт хоёр тэрбум төгрөгөөр циркийн барилга барина. Түүний хажууд Боловсролын үнэлгээний төв, Боловсролын хүрээлэн, Мэдээллийн төв байгуулагдахаар 15 тэрбум төгрөг 2021 оны төсөвт тусгагдсан. Бид дундаасаа ажлын хэсэг байгуулж, тус барилгад хяналт хийхээр тохиролцлоо.

Монгол Улсын Консерватори бол зөвхөн газрын эзэмшигч. Өмчлөгч биш. Өмчлөгч нь БШУЯ. Ганцхан барилгын асуудал биш Монгол Улсын Консерваторийн дотоод эрх зүйн орчныг сайжруулахад анхаарах болно” гэлээ.