“Эрдэнэс Тавантолгой” ХК 1072 хувьцааны ногдол ашигтай холбоотой мэдээллийг өглөө

Энэ талаар Хэвлэл мэдээлэл, Олон нийттэй харилцах хэлтсийн дарга М.Амарбаяр “Ногдол ашиг тавдугаар сарын 1-ээс хойш олгох ажлыг зохион байгуулах ТУЗ-ийн шийдвэр гарсан. Гэхдээ тавдугаар сарын 1-нд ногдол ашиг яг өгнө гэж хэлээгүй. Бид аль болох ногдол ашгийг хурдан олгохоор ажиллаж байна.

Өнөөдрийн байдлаар 1.7 сая иргэн хувьцааны дансаа нээлгэсэн ч 425 мянган иргэн л арилжааны банкны данстайгаа хувьцааны дансаа холбосон байна. Иргэд өөрсдөө хариуцлагатай хандах хэрэгтэй.

Манайхаас бичиг баримт, бүтгэлийн асуудалгүнэг сая орчим иргэний ногдол ашгийг Үнэт цаасны төвлөрсөн хадгаламжийн төв рүү шилжүүлсэн.

Өөрөөр хэлбэл, 425 мянган хүн болон банкнид дансаа нээлгэсэн боловч ҮЦТХТ-д мэдээлэл нь очоогүй байгаа 193 хүн буюу нийт 693 мянган иргэний ногдол ашгийг ҮЦТХТ-рүү шилжүүлсэн. Үүн дээр нэмээд банкны дансаа холбож баталгаажуулсан иргэдийг тооцоод сая орчим иргэний ногдол ашгийг шилжүүлсэн гэсэн үг.

Яагаад ногдол ашиг дансанд орохгүй байна гэдэг асуудал гарч байна. "Эрдэнэс-Тавантолгой" ХК 2.5 сая иргэний бүртгэлийг хянаж цэгцлэх ажил ид үргэлжилж байна.

Энэ ажилд "Эрдэнэс Тавантолгой" ХК-аас гадна Үнэт цаасны төвлөрсөн хадгаламжийн төв, арилжааны банк, НӨАТ систем, Улсын бүртгэл гэх мэт байгууллагуудтай хамтран иргэн бүрийн мэдээллийг нягталж хянаж байна гэв. Учир нь, Улсын бүртгэл дээр овог нэр нь адилхан эсвэл регистрийн дугаар нь адилхан байх зэрэг зөрчил илэрч байгаа ажээ. Бүртгэлийн асуудалгүй иргэдэд шууд ногдол ашиг шилжүүлэх боломжгүй байна. Иргэн бүрийн мэдээллийг нягталж, шалгаж, тулгаж байж шилжүүлнэ” гэлээ.