Харилцаа холбоо, мэдээллийн технологийн газрын дарга Б.Болор-Эрдэнэ болон Татварын ерөнхий газрын дарга З.Заяабал болон “Чатбот” ХХК-ийн Төслийн удирдлага, судалгаа, хөгжүүлэлтийн албаны захирал З.Оюунжаргал нар “E-Mongolia”-ийн талаар мэдээлэл хийлээ.

Төрийн үйлчилгээний нэгдсэн систем “E-Mongolia”-д татварын 48 үйлчилгээг нэгтгэснээр иргэд төрийн үйлчилгээний нэг цонхоор татварын үйлчилгээг авах боломж бүрдлээ. “E-Mongolia” нээлтээ хийснээс хойш нэг сарын хугацаанд 179253 иргэн хандаж, 148.267 иргэн үйлчилгээ авсан байна. Авто тээврийн хэрэгслийн улсын бүртгэлийн лавлагаа, Төрсний бүртгэлийн лавлагаа, Нийгмийн даатгалын шимтгэл төлөлтийн талаарх тодорхойлолтыг иргэд “E-Mongolia”-р дамжуулан авсан байна.

Татварын үйлчилгээ цахим болсноор татвар төлөхтэй холбоотой зардал буурсан. Бүртгүүлэх, тайлагнах, татвараа төлөх, тооцоолол, үлдэгдлээ баталгаажуулах, татварын өр хураахтай холбоотойгоор татвар төлөгчөөс гардаг зардлыг нэг жилд 20.8 тэрбум төгрөгөөр хэмнэх аж. 

Татварын ерөнхий газрын дарга З.Заяабал: “E-Mongolia”-ийн хүрээнд төрийн байгууллагууд хоорондоо уялдаатай болж, мэдээллийг цаасаар бус цахимаар авах боломж бүрдэж байна. Татвартай холбоотой үндсэн 45 үйлчилгээ цахим боллоо. Татварын системүүдээр нэг минутад 340 орчим нэг цагт 21000 орчим иргэн үйлчилгээ авдаг. Эхний есөн сарын дотор зөвхөн цахимаар хүсэлт гаргаж, тодорхойлолт авсан иргэдийн тоо давхардсан байдлаар 1589643 хүнд хүрсэн байна. 

Татварын үйлчилгээ цахим болсноор татвар төлөгчдөд хэр хэмжээний хөнгөлөлт үзүүлээд буйг бид тооцсон. 

• татвар төлөгчөөр бүртгүүлэх гэж Татварын албан дээр ирдэг зардлуудыг хэмнэсэнтэй холбоотойгоор 116  сая төгрөгийн хэмнэлт
• тайлан цаасаар тушаадаг байхад 18.5 тэрбум төгрөгийн зардал гардаг байсан. Энэ зардлыг тэг болголоо
• Банканд татвараа төлөхөд хоёр тэрбум төгрөгийн зардал гардаг байсан,
• Түүнчлэн авто тээврийн татвар төлөгчийн гэрчилгээг жил бүр хэвлүүлэхэд 100 орчим сая төгрөг зарцуулдаг байсан. Энэ үйлчилгээ байхгүй боллоо.
• Татвар төлөгчийн цэнхэр дэвтрийг хэвлэхэд жилд 150 сая төгрөг зарцуулдаг байсан бол цахимд шилжсэнээр энэ дэвтэр хэрэгцээгүй боллоо.
• Татвар төлөгч Татварын албанд биеэр ирж баталгаажуулалт хийх шаардлагагүй болсон. Улмаар 300 орчим сая төгрөгийг хэмнэж байна.

Нийт 21 орчим тэрбум төгрөгийн зардлыг хэмнэж байна.