Амьд хөгжмийг зөвхөн эрэгтэй хүн тоглох албагүй. Яагаад эмэгтэй хүн байж болохгүй гэсээр урлагт хөл тавьж нэгэн цагт хүн бүрийн аманд “Дурлал юу хүснэ вэ” хэмээн аялуулсан артист Daisy буюу Д.Дэлгэрцэцэгтэй ярилцлаа.
-Таны урлагт хөл тавих болсон түүхээс яриагаа эхэлье?
-Би багаасаа урлагийн хүн болохыг хүсч мөрөөддөг байсан. Тэр дундаа жүжигчин эсвэл дуучин гэх бодол минь хэзээ ч хувирч өөрчлөгдөж байгаагүй. Багадаа орос кино үзэж кинонд тоглож буй жүжигчин, дуучин шиг болох юмсан гэж боддог байсан мөрөөдөл минь явсаар урлаг руу хөтөлж оруулсан даа.
-Анхны дуу тань ямар дуу байв, хэрхэн бүтээж байсан бэ?
-Их сургуулиа төгсөөд гадагшаа явж ирээд “Madness” хамтлагтай танилцаж, клубт тоглож дуулах гараагаа эхлүүлж байсан. Анхны дуу гэвэл эгч нараараа китар тоглохыг заалгаж наймдугаар ангидаа ээждээ зориулан дуу хийсэн. Мэдээж түүнийг гаргаагүй. Харин мэргэжлийн түвшинд хийсэн анхны дуу 2000-аад оны эхэн үед “Уулзана аа, Зугаалга” гэх хоёр дуу гаргасан нь юм.
-Таны хувьд жүжигчин мэргэжилтэй шүү дээ. Мэргэжлээрээ ажиллахгүй дуучин боллоо гэхэд гэр бүлийнхэн тань хэрхэн хүлээж авч байсан бэ?
-СУИС-д шалгалт өгөөд тэнцсэн. Хэрэв тэнцээгүй байсан бол Багшийн сургуулийн хөгжмийн ангид орох байсан байх. Ийм сонголт надад байсан. Арван жилдээ сургуулийнхаа гочлол гитарчин, ёочин тоглодог байсан. Харин их сургуульд жүжигчний ангид орсноос хойш хөгжмөө тоглохгүй орхигдуулсан. Их сургуулиа төгссөний дараа Герман явсан нь өөрийгөө шинээр хайх аялал байсан болов уу. Ерөнхийдөө багаасаа хөгжимд дуртай байсан болохоор хэдий жүжигчин мэргэжил эзэмшсэн ч өөрийгөө алдчихсан юм шиг мэдрэмж төрдөг байсан тул Герман руу явсан. Энэ нь өөрийгөө шинээр эрж хайх аялал байсан болов уу гэж боддог. Түүний дараагаар Монголдоо ирэхэд Рок Р.Мөнхсайхан ах “Чи гитар тоглодог юм чинь яагаад гитар бариад тайз нь дээр байж болохгүй гэж. Чамд илүү хөгжимлөг чадвар байгаад байх шиг байна” гээд урам өгч, удалгүй “Madness” хамтлагийнхантай танилцаж дуулдаг болсон. Харин жүжигчний мэргэжлээ орхиод яагаад дуулав гэдэг дээр гэр бүлийн зүгээс шүүмжлэх зүйл огт байгаагүй. Учир нь, багаасаа гэр бүлийнхнийхээ өмнө бүжиглэж, жүжиглэж, дуулж, инээлгэж байсан тул миний шийдвэрийг хэзээ ч эсэргүүцэж байгаагүй.
“Madness” хамтлаг намайг амьд хөгжимд илүү дурлуулсан
-Анхны тайзан дээр гарч байсан мэдрэмжээ ямар байсан вэ?
-“Madness” хамтлагийнхантай танилцахад намайг маргааш гитартайгаа хүрээд ир гээд явуулсан. Тэр үед надад гитар байгаагүй учраас бэлтгэлийн газраас гараад л дэлгүүр хэсэж солонгос хар банзан гитар авч байлаа. Гитар авсныхаа дараа гэртээ өөрийгөө голохгүй болтлоо хавраас намар хүртэл бэлтгэл хийсний дараагаар шалгуулсан өдрөө тэнцэж, тайзан дээр гурван дуу дуулсан. Гэхдээ маш их сандралтай дуулсныхаа дараа арын өрөөнд ороход манай хамтлагийнхан сайн байна, болж байна гээд урам өгч байсан. Манай хамтлагийн ахлагч Сайхнаа тоглолтын дараа цалингаа бүгдэнд нь адилхан хувааж өгөхөд би гайхаад “Надаа цалин яах юм бэ. Надад дуулах нь л чухал” гэсэн чинь юу яриад байгаа юм гээд өгч байсан нь таалагдсан. Тухайн үед “Madness” хамтлагийн дуунууд хит болчихсон байсан болохоор одуудтай хамт нэг тайз нь дээр гарч дуулсандаа итгэдэггүй.
-Таны дууг сонсдог, таныг дэмждэг олон залуус бий болсон. Ер нь хүмүүст танигдаж эхэлсэн тэр мэдрэмж ямархуу санагдсан бэ?
-Тухайн үед клубуудээр байнгын бэлтгэл хийхийн хажуугаар тоглолт хийдэг байсан. Ерөнхийдөө миний хувьд массыг хамарсан поп од байхыг хүсдэггүй. Миний сонирхол андерграунд талдаа байдаг. Мөн дээрээс нь хүсч, дурлаж сонсдог хамтлаг дуунууд ч тийм андергаунд байсан болохоор ганцаараа уран бүтээл хийж, олны танил болох хүсэл,зорилго бага байсан тул хамтлагтай байхыг илүүд үзсэн. Үүнээс гадна “Madness”-тай хамт дуулж эхэлснээс хойш амьд хөгжимд дурлаж, амьд хөгжмийг дан ганц эрэгтэй хүн тоглох албагүй шүү дээ, эмэгтэй хүн яагаад тоглож болохгүй гэж бодоод амьд хөгжмийг сонгосон. Түүнчлэн, “Сансара” хамтлагийг байгуулсан ч эмэгтэй хүн бүх амьдралаа хөгжимд зориулна гэдэг хатуу учраас тарж байсан юм. Түүний дараагаар нөхөртэйгөө танилцсан. Нөхөр бид хоёрыг урлаг, “Madness” хамтлаг хүсэл сонирхол, зорилго нийлүүлсэн. Манай нөхөр киноны хөгжим хийхийн хажуугаар киноны 2-3 дуу хийдэг байсан. 2009 онд Зөрлөг УСК-ны нээлт дөхчихсөн болохоор дуунуудаа нэхэхэд нь би дуулж таарсан юм. Би “Дурлал юу хүснэ вэ” дууг санаандгүй ажлын шаардлагаар дуулсан гэж болно. Энэ дууг анх сонсохдоо надад зохихгүй ээ. Би поп дуу дуулдаггүй гэж байсан ч ажил учраас акустик, гитарны дугаралтыг нь нэмж амьд хөгжим рүү ойртуулж дуулж байлаа. Гэтэл санаандгүй дуулсан байхад клип нь гараагүй байхад радиогоор нийтэд хүрч, хүмүүс аяладаг мэддэг болчихсон байсан. Энэ дууг хит болно, үүнийг л дуулчихвал од болно гэж бодож дуулаагүй учраас надад маш их таалагдсан. Хүмүүс ихэнхдээ “Дурлал юу хүснэ вэ” дуугаар мэддэг бол амьд хөгжим сонирхдог хүмүүс миний бусад дуунуудыг сайн мэддэг.
- Та “Дурлал юу хүснэ вэ” гэж дуулдаг шүү дээ. Таны хувьд дурлал яг юу хүсдгийг мэдэж авсан уу?
-Манай найзууд тоглоом хийгээд “Дурлал юу хүснэ вэ” гээд л байх юм дурлал юу хүсдгийг чи мэдэх юм уу гээд байдаг юм. Би хариултыг нь тийм ч сайн мэдэхгүй. Гэхдээ энэ дуу яагаад олон хүнд хүрсэн нь дууны үг бичсэн манай нөхөртэй холбоотой. Манай хүн дууны үгийг сүнслэг бичдэг л дээ. Түүнийг нь ухаж ойлгох нэгэн байхад, ойлгохгүй хүн ч байдаг. Тухайн үед би “Дурлал юу хүснэ вэ” дууны үгийг ч ойлгохгүй дуулж байсан. Яг хоолойнд орж байхдаа нөхөртөө зөндөө загнуулж гарч яван байж дуулсан. Дараа нь үгийг нь ойлгоогүй ч гэсэндээ ямар дотортой, мэдэрч дуулсан юм гэж бодож байсан. Энэ дууны сүнслэг оршихуйн хүмүүст хүрсэн байх л гэж ойлгодог. Мөн уг дуу нь маш олон хосуудыг нийлүүлснээрээ онцлог. Олон залуус таны дууг сонсож, дотносож, танилцаж байсан та бидний хуриманд энэ дууг дуулаад өгөөч гэж ирдэг.
Нөхрөө анх хараад миний мөрөөдлийн урт үстэй, гоё стильтэй өндөр туранхай залуу байсан ч анхны харцаар дурлаагүй. Харин...
-Нөхөртэйгөө анх яаж танилцаж байсан бэ?
-СУИС-д орохдоо урт үстэй, царайлаг залуучууд байдаг байх гэж мөрөөдөж орсон. Гэтэл тийм байгаагүй/инээв/. Манай нөхөр “Madness” хамтлагийн соль гитарчин байсан. Харин сонирхолтой нь намайг “Madness” хамтлагтай танилцсан өдрийн өмнөх өдөр манай нөхөр баруун руу зөрөөд явчихсан юм билээ. “Madness”-тай тоглож байх хугацаанд хамтлагийнхан Гангийн талаар мундаг авьяастай хурдан ирээсэй, Ганг байсан бол энэ дуу сунжрахгүй дуусчих байсан юм гээд л ярьдаг байсан. Түүнээс хойш дөрвөн жилийн дараа 2004 онд ирэх үед бэлтгэл дээр анх танилцаж байсан. Гэхдээ тэрнээс өмнө чихээрээ нэг нэгнийгээ аль хэдийнэ мэддэг болчихсон байсан л даа. Анх харахад миний мөрөөдлийн урт үстэй мөн урлагийн гоё стильтэй өндөр туранхай залуу байсан ч анхны харцаар дурлаагүй. Харин найзууд байж байгаад урлаг бид хоёрыг нэг гэр бүл болгосон юм.
-Удахгүй таны тогтлолт болно. Тоглолтынхоо талаар мэдээлэл өгнө үү?
-Цар тахлын үед урлагийнхан ажилгүй гэртээ суусан. Тэр үед би зүгээр суулгүй найзынхаа шинэ телевизийн арын албанд ажиллаж байгуулахад нь туслалцаа үзүүлсний дараагаар шинэ уран бүтээл хийх талаар бодсон юм. Би СD эсвэл пянз хэвлээгүй боловч надад хоёр цомгийн хэмжээний дуу байдаг юм байна. Тиймээс нөхрийнхөө уран бүтээлүүдийг таниулж, өөрийн дуунуудыг дуулмаар байгаа учраас хамтлагаа бүрдүүлж уран бүтээлдээ орохын тулд найз нөхөддөө зориулахаас гадна өөрөө урам зориг авч идэвхжүүлэхийн тулд хийж буй бэлтгэл тоглолт гэж болно.
