Замын цагдаагийн уулзварт гүүр барих бүтээн байгуулалтын ажлын явц 62 хувьтай үргэлжилж байна. Үндсэн гүүрийн хөдөлгөөнийг ирэх есдүгээр сард нээх төлөвлөгөөтэй ажиллаж байгаа юм байна.
Энэхүү бүтээн байгуулалт нь төмөр замаар тусгаарлагдсан хотын төвийн хэсгүүдийг холбосон босоо тэнхлэгийн гол замын сүлжээг бий болгож, хөдөлгөөний аюулгүй байдал, замын хөдөлгөөний ачааллыг бууруулж, зорчигч тээвэрлэгчдийн цаг хугацааг хэмнэх, нийслэл хотын өнгө үзэмжийг сайжруулах гэх мэт чухал ач холбогдолтой гэж төсөл хэрэгжүүлэгч нар тайлбарлаж байгаа юм.
Бүтээн байгуулалтын хүрээнд Олимпийн гудамж, Их монгол улсын гудамжийг холбосон дөрвөн эгнээ, 470 метрийн урттай төмөр бетон гүүр барьж, үндсэн гүүрийг Нарны замтай холбох нийт 1077 метрийн урт гүүр, налуу замууд баригдаж байна.
Өнөөдрийн байдлаар Их Монгол улсын гудамж, Олимпийн гудамжийг өргөтгөх шинэчлэх ажлыг хийж байна. Нийслэлийн Засаг дарга С.Амарсайхан бүтээн байгуулалтын ажлыг эрчимжүүлэх үүрэг даалгавар өгсний дагуу шуурхайлж ажиллаж байгаа юм байна. Үндсэн замын хөдөлгөөнийг ирэх есдүгээр сард нээх төлөвлөгөөтэй ажиллаж байна.
Уг бүтээн байгуулалтыг БНХАУ-ын Засгийн газраас Монгол Улсын Засгийн газарт олгох хөнгөлөлттэй зээлийн хөрөнгөөр хэрэгжүүлж байгаа.
Замын цагдаагийн уулзвар дээгүүр баригдах гүүрэн гарц баригдснаар нарны зам, Гадаад хэргийн яамнаас Home плаза хүртэлх замын түгжрэл багасч, төмөр замаар гарах авто машины осол аваар буурна гэж тооцжээ.
