Ардчилсан намын даргын сунгаа дөрөвдүгээр сард болно. Сунгаанд Ерөнхийлөгч асан Х.Баттулга, УИХ-ын гишүүн Ж.Батсуурь нар өрсөлдөхөөр нэрээ бүртгүүлээд байгаа юм. Намын даргын сунгаанд оролцож буй нэр дэвшигч 500 сая төгрөгийн дэнчин төлж байгаа аж. Энэ талаар УИХ-ын гишүүн Ж.Батсуурь байр сууриа илэрхийллээ. 

Тэрээр "Ардчилсан намын Дотоод сонгуулийн хороо намын даргын сунгааг шинээр зарласан. Дөрөвдүгээр сарын 3-нд дүнгээ гаргах ёстой. Энэ сунгаанд АН-ын ямар ч гишүүн нэрээ дэвшүүлэх боломжтой. АН УИХ-д суудалтай нам учраас парламентын гишүүн энэ намыг даргалах байх ёстой гэдэг үзэл санаатай хүн. О.Цогтгэрэл гишүүн нэрээ татсан тул би нэрээ дэвшүүлсэн. Олон сайхан залуус нэрээ дэвшүүлэх байх гэж бодтол хамгийн сүүлд экс Ерөнхийлөгч маань нэрээ дэвшүүлсэн. Ингээд хоёр хүн нэрээ дэвшүүлээд байна. АН бол асар том нам. Тиймээс татвар болон итгэл дээр явдаг. Би дэнчингийн 500 сая төгрөгөө цаг хугацаанд нь төлсөн. Энэ мөнгө сонгууль зохион байгуулахад зарцуулагдана" гэлээ.