Үндсэн хуульд нэмэлт өөрчлөлт оруулах тухай хуулийн төслийн хоёрдугаар хэлэлцүүлгийг УИХ хийж дуусгасан. Өчигдөр орой МАН-ын бүлэг хуралдаж, Үндсэн хуулийн нэмэлт өөрчлөлтийн гуравдугаар хэлэлцүүлгийг хийхээс өмнө Үндсэн хуулийн өөрчлөлтөөр  Ард нийтийн санал асуулга явуулах нь зүйтэй гэж шийдвэрлэснийг мэдээлсэн. 

Тэгвэл уг шийдвэрийн талаарх Ерөнхийлөгчийн байр суурийг ЕТГ-ын дарга З.Энхболд өнөөдөр Төрийн байгуулалтын байнгын хорооны хурал дээр илэрхийллээ. 

ЕТГ-ын дарга З.Энхболд хэлэхдээ "Ерөнхийлөгч Үндсэн хуулийн өөрчлөлтийг ард түмнээс асуух МАН-ын бүлгийн шийдвэрт талархаж байгаа. Гэхдээ ганцхан одоогийн өөрчлөлт дээр дэмжинэ, дэмжихгүй гэж асуух нь учир дутагдалтай байна. Засаглалын хэлбэр, Ерөнхий сайдын эрх мэдэлтэй холбоотой шийдвэрүүд дэмжигдээгүй. Ерөнхий сайд нь танхимын гишүүдээ мэддэг байх, давхар дээлгүй байх, сонгуулийн системын хувьд сайн, муу талыг саармагжуулсан холимог тогтолцоотой байх, гишүүдийн тоо 108 байх, УИХ-ын бүрэн эрхийн хугацаа таван жил байх зэрэг заалтууд унасан. Тиймээс одоогийн Үндсэн хуулийн энэ өөрчлөлт реформын шинжтэй болсон гэж үзэхгүй байна. Тиймээс Үндсэн хуулийн  3 дугаар зүйлийн 1-д заасны дагуу Засгийн бүх эрх мэдэл ард түмний мэдэлд байдаг нь тунхаг биш гэж үзэж байгаа юм бол засаглалын хэлбэрээ ард түмнээс одоогийн ээлжит болон ээлжит бусаар явуулах сонгуулийн саналын хуудаст заавал бич. Монголын ард түмэн Ерөнхийлөгчийн засаглалтай байх уу, парламентын засаглалтай байх юм уу гэдгийг асууя. 

Монголын ард түмэн ямар засаглалтай байх вэ гэдгээ сонгож, ард түмний зааврын дагуу УИХ шинэ Үндсэн хуулиа боловсруулаад тарах ёстой.

Ард түмэн Ерөнхийлөгчийн засаглалыг сонговол Ерөнхийлөгч ард түмнээсээ, парламентын засаглалыг сонговол Ерөнхийлөгч парламентаасаа сонгогдох ёстой. Аль замаар нь явах вэ гэдгээ ард түмнээсээ заавал асуух хэрэгтэй. Ингэхгүй бол одоогийн Үндсэн хуулиа сайжруулаад явна гэтэл бодитой өөрчлөлт орсонгүй. Төрийн өмчийг нийтийн өмч гэснээс өөр гялтайх зүйл алга гэж дүгнэж байна. Энэ өөрчлөлтийг УИХ яаж ч баталж гаргасан Ерөнхийлөгчийн байр суурь Үндсэн хуулийн 3.1-д заасны дагуу, мөн заалтыг хэрэгжүүлэх зорилгоор иргэдээс асуух юм. Түүнийг батлах эсэх нь УИХ-ын ажил болж үлдэнэ. Өөрчлөлтөө хийж, ажилладаг Үндсэн хуультай болж улс орныхоо хөгжлийг шинэ шатанд гаргах хэрэгтэй.

Хуучин 76 тойргоо санагалзаж, түүнээсээ салж чаддаггүй, гишүүн нь сайд болдог боломжоо алдахыг хүсэхгүй байх юм бол реформ хийгдэхгүй. Өнөөдрийн болон дараагийн хэлэлцүүлгээс ямар байдлаар Үндсэн хуулийн нэмэлт, өөрчлөлтийн төсөл гарах вэ гэдгээс хамаарч Ерөнхийлөгч ард нийтийн санал асуулга явуулах саналын томъёоллоо бэлтгэж байгаа” гэлээ.