БНХАУ-ын эрүүл мэндийн хорооны мэдээгээр нэгдүгээр сарын 28-ны 10.00 цагийн байдлаар шинэ коронавирусаар өвчилсөн хүн 4439, нас барсан 106 тохиолдол бүртгэгдээд байгаа билээ. Тэгвэл дэлхийн хэмжээнд 4474 хүн халдвар авсан нь тогтоогдсон. Энэ үед олон нийтийн газраар явахгүй байхыг Нийслэлийн Мэргэжлийн хяналтын газраас анхааруулж, үйл ажиллагааг зогсоосон байгууллагуудыг танилцууллаа.
Монгол Улсын Засгийн газрын 2020 оны 30 дугаар тогтоол, Улсын Онцгой комиссын нэгдүгээр сарын 24-ний өдрийн I хурлын тэмдэглэл, Нийслэлийн Онцгой комиссын нэгдүгээр сарын 25-ны өдрийн II хурлын тэмдэглэл, Нийслэлийн Засаг даргын нэгдүгээр сарын 27-ны өдрийн А/108 дугаар тушаалыг үндэслэн томуу, томуу төст өвчлөл, тархалт болон коронавирусын халдвараас хүн амыг урьдчилан сэргийлэх, хамгаалах зорилгоор дараах газруудын үйл ажиллагааг гуравдугаар сарын 02-ны өдрийг хүртэлх хугацаанд зогсоосон болохыг мэдэгдэж байна. Үүнд: 1. Ерөнхий боловсролын сургуулиуд 2. Цэцэрлэгүүд 3. Мэргэжлийн боловсрол, сургалтын байгууллагууд 4. Дээд боловсролын байгууллагууд 5. Номын сан, кинотеатр зэрэг соёл, урлаг, үзвэр үйлчилгээний газрууд 6. Спортын тэмцээн, уралдаан зохион байгуулах газрууд 7. Жолооны курс 8. Мэргэжлийн түр сургалтын байгууллагууд /бүх шатны сургалтын төвүүд, мэргэжил олгох түр сургалтууд, хэлний дамжаа, курс, хүүхдийн ордон, хүүхдийн урлан бүтээхийн дугуйлан г.м/ 9. Интернет, цахим тоглоомын газрууд 10. Бага насны хүүхдийн төрөл бүрийн тоглоомын газрууд 11. Өдөр өнжүүлэх төвүүд 12. Хүүхэд харах үйлчилгээний газрууд Тодруулбал, Өмчийн аливаа хэлбэрийг үл харгалзан 197 сургууль, 457 цэцэрлэг, их дээд сургууль, мэргэжлийн сургалт үйлдвэрлэлийн төв 95, жолооны курсууд, кино театр, номын сан, хүүхдийн тоглоомын төвүүд зэрэг урлаг соёлын 42 байгууллага, интернет цахим тоглоомын 167 газрын үйл ажиллагааг зогсоох, томоохон сургалтын танхимтай 76 ресторан, зочид буудлуудын захиргаанд олныг хамарсан үйл ажиллагааг зохион байгуулахгүй байх талаар мэдэгдэл хүргүүлж биелэлтэнд НМХГ-аас хяналт тавьж ажиллаж байгаа юм байна. Түүнчлэн Нийслэлийн мэргэжлийн хяналтын байгууллагаас “Томуу, томуу төст өвчний өвчлөл, тархалт болон шинэ коронавируст халдвараас урьдчилан сэргийлэх үүднээс нийслэлд үйл ажиллагаа явуулж буй 2 болон 3 дах шатлалын 17 эмнэлэг, гахай, шувуу, үхрийн фермийн аж ахуй эрхлэгч 303 байгууллага, нийтийн тээврийн газруудад эрүүл ахуй халдвар хамгааллын дэглэмийг хатуу мөрдөх, ариутгал халдваргүйжүүлэлтээ сайжруулах зэрэг асуудлаар мэдэгдэл хүргүүлсэн байна.
Олон нийтийг хамарсан хурал цуглаан, сургалт, спортын тэмцээн уралдаан, аялал зугаалгын үйл ажиллагаа зохион байгуулахгүй байх, 04:00 цаг хүртэл ажилладаг ресторан, баар, кафег 00:00 цаг хүртэл ажиллуулах, сургууль, цэцэрлэгийн насны хүүхдүүдийг албан байгууллага, олон нийтийн үзвэр, үйлчилгээний газраар дагуулж явах, үйлчлүүлэх, үйлчлэхийг хориглохыг зөвлөж байна. Хэрэв уг шийдвэрийг хэрэгжүүлж ажиллаагүй тохиолдолд Төрийн хяналт шалгалтын тухай, Зөрчлийн тухай, Зөрчил шалган шийдвэрлэх тухай хуульд зааснаар арга хэмжээ авах юм байна.
Соёл, урлаг, үзвэр үйлчилгээний үйл ажиллаг зогсоосон 42 байгууллагатай танилц.
