Манай улсад 5200 орчим эм бүртгэлтэй байдгаас гурван эм тутмын нэг нь хуурамч гэх мэдээллийн дагуу Эм, эмнэлгийн хэрэгсэл, үйлдвэрлэлийн хэлтсийн дарга Г.Цэцэнсанаагаас тодрууллаа.

- Дэлхийн эрүүл мэндийн байгууллагаас гаргасан судалгаанд манай улсад орж ирж буй гурван эм тутмын нэг нь хуурамч гэсэн мэдээлэл байна. Үүнээс харахад яамнаас эмийн чанар аюулгүй байдалд хяналт тавьж чадахгүй байна уу гэсэн эргэлзээг бий болгох боллоо?

-Азийн хөгжлийн банкны санхүүжилтээр улсын эмнэлгүүдийн эмийн хүртээмжийг сайжруулах төсөл хэрэгжсэн юм. Тус төслийн хүрээнд зах зээлд байгаа 1770 эмийг түүвэрлэн авч судалгаа хийхэд 11 хувь нь стандартын бус эм болох нь тогтоогдсон. Энэ нь эмийн найрлага шинж чанар нь стандартын шаардлага нийцээгүй гэсэн үг. Мөн судалгаанд орсон эмнүүдээс 4.3 хувь нь бүртгэлгүй бөгөөд ихэвчлэн импортоор орж ирсэн эмүүд байсан. Мөн энэ судалгаагаар дуураймал эм нэг байгааг тогтоосон ба виагри гэдэг эм юм. Хуурамч эм гэдэг нь санаатайгаар эмийн найрлагад багтах зүйлсийг оруулалгүй, өөрчилж, савлагааг дуурайлган хийсэн болохыг хэлдэг.

-МХЕГ-аас Монголд эм үйлдвэрлэж буй компаниуд дотроо хуурамч эм үйлдвэрлэж байгааг тогтоосон байдаг. Энэ төрлийн зөрчлөөс сэргийлж яамнаас ямар хяналт тавьдаг вэ?

-Эмийн үйлдвэрүүд тусгай зөвшөөрөл авч, стандартаа хангаж ажиллах ёстой. Эмээ  үйлдвэрлэснийхээ дараа шалгуулж, стандартын шаардлага хангасан тохиолдолд улсын бүртгэлд бүртгэдэг юм. Гэхдээ үйлдвэрт үйлдвэрлэсэн эм хуурамч биш, стандартын шаардлага хангаагүй эм үйлдвэрлэсэн тохиолдол байсан болов уу.  

-Толгой өвдөхөд уудаг эм гэхэд л 20-30 төрөл байдаг. Үнэ нь ч ялгаатай. Ер нь манай эмийн стандартад аливаа эмийн найрлагыг хэрхэн заасан байдаг юм бэ?

-Эм дотроо олон химийн үйлчлэл, идэвхт бодистой. Жишээ нь, парацетамол гэсэн женерик эмийг Монголд хэд хэдэн үйлдвэр хийж байна. Ямар ч үйлдвэр тухайн эмэнд орох бодисын ижил стандарттай байх ёстой байдаг. Хэрэв стандартад хүрээгүй бол стандартын бус эм гэж үзэж, бүртгэхгүй.

-Импортоор ч ижил төрлийн стандарттай эм орж ирдэг гэсэн үг үү?

-Импортоор оруулж ирж буй эм улсын бүртгэлд бүртгэгдсэн байгаа. Улсын бүртгэлд бүртгүүлэхийн тулд манай “Хүний эмийн зөвлөл” ажилладаг бөгөөд лабораторид шинжилгээ хийж, баримт бичгийн хяналтыг үзээд бүртгэх эсэхийг шийддэг.  

-Эм, эмнэлгийн хэрэгслийн хяналт, зохицуулалтын газар шинээр байгуулагдах нь ямар ач холбогдол юм бэ?

-Дэлхийн улс оронд эмийн зохицуулалтын байгууллага нь тусдаа байдаг бөгөөд зарим улсад хүнс, эмийн агентлаг гэж бий. Эмийн хяналтын бие даасан байгууллага байгуулснаар эмийн зохицуулалтын чиг үүргийг нэгдсэн байдалд оруулж, салбар хоорондын уялдаа холбоо сайжирч, эмийн чанар аюулгүй байдал хангагдаж, иргэдэд хүрч буй эмийн үнэ буурах давуу талтай.

-Иргэд хуурамч эмийг ялгах боломжтой юу?

-Нэгд, эм хүнс биш учир зохистой хэрэглэж, эмчийн зааврын дагуу худалдаж авах ёстой. Хоёрт, эмийг зөвшөөрөл бүхий эмийн сангаас худалдан авах хэрэгтэй юм. Гуравт, иргэн худалдан авч буй эмийнхээ хугацааг харж, хаяг шошго, савлагаа сэжигтэй байгаа эсэхийг харж, шаардлагатай тохиолдолд холбогдох газарт нь мэдээлж болно.