Хөгжлийн банкны чанаргүй зээлийн асуудалд улстөрчид хамааралтай байгаа эсэхийг хууль, хяналтын байгууллагууд шалгаж байгаа билээ. Одоогийн байдлаар өмнөх УИХ болон одоогийн УИХ-д гишүүнээр сууж байсан, сонгуульт албан тушаал хашиж байсан хэд хэдэн улстөрчийн нэр тодроод буй. Дийлэнхийнх нь хандлага "Би хамаагүй", "Би тэр үед нөлөөлөх албан тушаалгүй байсан" гэх тайлбарыг өгөөд байгаа юм. 

Тэгвэл АТГ-ын Мөрдөн шалгах хэлтсийн ахлах мөрдөгч Ч.Жаргалбаатар энэ талаарх байр сууриа "Зууны мэдээ" сонинд илэрхийлжээ. 

Тэрээр "Улстөрчдийн авлигачидтай тэмцэх хүсэл сонирхол, соёл гэж юм төлөвших ёстой. Магадгүй улстөрчид өөрийн хамаарал бүхий этгээдэд зээл аваад өгчихсөн, эрх нөлөөгөө урвуулаад ашиглачихсан болбол өөрөө ард түмнээс уучлалт гуйгаад огцорчих ёстой. Шударгаар хуулийн байгууллагаар шалгуулах ёстой. Гэтэл манайд ийм улстөрчид гарахгүй байгаа л даа. Бүгд өөрөө өөрийгөө өмгөөлнө, хамгаална, магадгүй явж, явж хамгийн сүүлд нь эдийн засгийн эрсдэлээ тооцож чадаагүйнхээ хор хохирлыг төр лүү чихнэ" гэсэн байна.

Улстөрчид авлига, хээл хахуулиас хамгийн хол байж, тэдэнтэй тэмцэх ёстой. Гэтэл авлигатай тэмцэх битгий хэл өөрсдөө авлигын эх уурхай болоод байна.