Монгол Улсын Ерөнхийлөгч Х.Баттулгын зарлигаар Улсын заан цолны болзол хангасан бөхчүүдэд одон медалийг нь гардууллаа. Үндэсний их баяр наадмын үндэсний бөхийн барилдаан долоо давсан Булган аймгийн Сайхан сумын харьяат улсын харцага Н.Түвшинбаяр, Сэлэнгэ аймгийн Мандал сумын харьяат улсын харцага Н.Жаргалбаяр нар улсын заан цол хүртлээ.
Монгол Улсын Ерөнхийлөгч Х.Баттулгын зарлигаар Үндэсний их баяр наадмын үндэсний бөхийн барилдаанд тав давсан бөхчүүдэд начин цол олголоо. Үндэсний их баяр наадмын үндэсний бөхийн барилдаанд тав давсан Булган аймгийн Гурванбулаг сумын харьяат аймгийн арслан Б.Бат-Эрдэнэ, Булган аймгийн Бүрэгхангай сумын харьяат аймгийн арслан Д.Тамир, Говь-Алтай аймгийн Чандмань сумын харьяат аймгийн арслан Б.Хишигбаатар, Төв аймгийн Сүмбэр сумын харьяат аймгийн арслан Г.Ганжад, Баян-Өлгий аймгийн Улаанхус сумын харьяат аймгийн арслан Б.Серик, Архангай аймгийн Батцэнгэл сумын харьяат аймгийн арслан Ж.Дагва-Очир нар шинээр начин цол хүртлээ.
Дашрамд дурдахад Баян-Өлгий аймаг 35 жилийн дараа начин цолтон төрж байгаа бөгөөд хамгийн зулуу начин цолтноор Баян-Өлгий аймгийн бөх Серик тодорсон байна.
Монгол Улсын Ерөнхийлөгчийн зарлигаар Үндэсний их баяр наадмын үндэсний бөхийн барилдаан зургаа давсан бөхчүүдэд улсын харцага цол олголоо.
Үндэсний бөхийн барилдаан зургаа давсан Архангай аймгийн Цэнхэр сумын харьяат Бөх билэгт дэмжээний бөх, аймгийн арслан М.Бадарч, Ховд аймгийн Буянт сумын харьяа Ховд дэвжээний бөх, аймгийн арслан О.Хангай нар шинээр харцага цол хүртлээ.
