УИХ-ын дарга З.Энхболд гуравдугаар сарын 29-нөөс дөрөвдүгээр сарын 1-н хүртэл дөрөв хоног ээлжит бус чуулган зарлан хуралдуулах захирамж гаргасан. Гэтэл гишүүдийн ирц хүрэлцэхгүй байгаа учраас ээлжит бус чуулган хуралдаж чадахгүй байгаа юм. Тус чуулганаар "Ашигласан түлшний болон цацраг идэвхт хаягдлын менежментийн аюулгүй ажиллагааны тухай нэгдсэн конвенц"-д нэгдэн орох тухай хуулийн төслийг хэлэлцэх байсан юм. Мөн Бага хэмжээний цөмийн материалын шинэчилсэн протоколыг соёрхон батлах хуулийн төсөл, Цөмийн аюулгүй ажиллагааны 1994 оны конвенцид нэгдэн орох тухай хуулийн төсөл, Цөмийн материалыг биечлэн хамгаалах 1980 оны конвенцийн 2005 оны нэмэлт өөрчлөлтийн протоколыг соёрхон батлах тухай хуулийн төслийг хэлэлцэх байсан. Гэсэн хэдий ч ээлжит бус чуулганы ирэц хүрэлцэхгүй байгаа. Тодруулбал, УИХ дахь МАН-ын бүлгийн гишүүд болон бие даагчид чуулганы хуралдаанд орж ирээгүй байна. Учир нь тус конивенцид нэгдэх нь Монгол Улс цөмийн болон цацрагт идэвхт бодисын хаягдлыг Монгол Улсын нутаг дэвсгэрт булшлах гэж байна хэмээн үзэж байгаа учраас ээлжит бус чуулганы хуралдаанд суухгүй байгаа хэмээн тайлбарлаж байгаа юм. Харин АН-ын бүлэг өчигдөр хуралдаж олон улсын цөмийн аюулгүй байдлын конивенцид нэгдэн орох, конивенцийг соёрхон батлахаас гадна Засгийн газар Монгол Улс Бусад улсын ашигласан цацраг идэвхт бодис, түлш хаягдлыг өөрийн нутаг дэвсгэрт импортоор оруулж ирэхийг хориглох тухай хуулийн төслийг санаачлан өргөн барих чиглэл өгсөн. УИХ-ын ээлжит бус чуулганаар хэлэлцэх асуудлын талаар гишүүдийн байр суурийг хүргэж байна.

УИХ-ын гишүүн Н.Энхболд: Өчигдөр орой Засгийн газар цөмийн хаягдлыг Монгол Улсад оруулж ирэхгүй гэсэн  хуулийн төслийг өргөн барьсан байна. Энэ хуулийн төсөл нь гаднаас  хаягдал оруулахгүй, манайхаас гаргасан ураныг боловсруулаад үүссэн хаягдлыг ч оруулахгүй гэсэн агуулгатай юм байна. Гэхдээ олон улсын конвенцид тодруулах зүйлүүд бий. Маш сайн нарийвчлан судлах олон заалт байгаа. Сүүлд нь ямар нэгэн асуудал үүслээ гэхэд олон улсын гэрээ конвенц дотоодын хуулиас илүү хүчин төгөлдөр үйлчлэх асуудал гаргахгүй байх талаас нь судлах шаардлагатай.

УИХ-ын гишүүн Ч.Хүрэлбаатар: УИХ-ын дарга, АН-ын дарга З.Энхболд өөрийнхөө цахим хуудаст “Цөмийн хаягдлыг үүссэн, бий болсон оронд нь булшлахыг ойлгож тэмдэглэхийн зэрэгцээ” гэж бичсэн байгаа. Монгол Улс цөмийн хаягдлын тухай олон улсын гэрээ конвенцод нэгдсэнээр уранаа ямар ч улс орон руу экспортлоод гарсан хаягдлыг нь буцааж оруулж ирээд өөрийн нутаг дэвсгэрт булшлах үүрэг хүлээх юм. Цөмийн хог хаягдал л бол хаягдал шүү дээ. Гадаадаас импортоор оруулж ирэхгүй ч гадаадад боловсруулсан  хаягдлыг Монгол Улсад булшлах үүрэг хүлээнэ. Засгийн газар нэгхэн өдөрт багтаад хуулийн төсөл боловсруулаад өчигдөр орой өргөн барьсан. Тэгэхээр Монгол Улсын хуулийн дээр нэгдэж орсон гэрээ, конвенцууд байдаг.  Нөгөө талаар долоо хоногийн дараа хаврын ээлжит чуулган эхэлнэ. Тиймээс нэг өдрийн дотор яаравчлан хэлэлцүүлэх биш, долоо хоногийн дараа хаврын чуулганаар хэлэлцүүлээд чуулганы явцад цөмийн хаягдалтай асуудлаар олон нийтэд үүсээд байгаа эргэлзээг тайлах учиртай. ТББ-уудын дуу хоолойг сонсъё. Энэ чиглэлээр ажилладаг мэргэжилтнүүдийн ч байр суурийг сонсох хэрэгтэй. Энэ мэт олон талаас нь цэгнэж байгаад энэ асуудлыг хэлэлцэх нь зүйтэй. Яахаараа нэгхэн өдөр хуралдах ээлжит бус чуулган дээр энэ асуудлыг яаран  хэлэлцэх гээд байна вэ  гэдэгт л бид эргэлзэж байгаа. Ер нь хуралд зориулж хууль батална гэдэг гамшиг.

УИХ-ын гишүүн Д.Хаянхярваа: МАН-ын бүлэг дөнгөж сая хуралдлаа. Манай намыг бойкотолж байна гэх мэдээллийг АН-ын бүлгийн дарга хийж байгаа нь тун харамсалтай. МАН, АН-аасаа хамааралгүйгээр энэхүү асуудлыг үндсэн чуулганаараа нухацтай хэлэлцэх ёстой гэж үзэж байна. Засгийн газар нь хуралдаад Ашигласан түлш, цөмийн болон цацраг идэвхт хаягдлыг Монгол Улсын хилээр оруулахыг хориглох тухай хуулийг өргөн барьсан байна. Энэхүү хуулийг аваад үзэхэд нүглийн нүдийг гурилаар хуурах гээд байна. Учир нь Үндсэн хуулийн 10.2-т Монгол Улс олон улсын өмнө хүлээсэн үүргээ шударгаар сахина, мөн 10.3-т олон улсын гэрээ конвенцийг соёрхон баталсан нэгдэн орсон хууль хүчин төгөлдөр болмогц дотоодын хуулийн нэгэн адил үйлчилнэ гэж заасан. Мөн олон улсын гэрээний тухай хуулийн 2.2-т Монгол Улсын олон улсын гэрээнд энэ хуулинд зааснаас өөрөөр заасан бол олон улсын гэрээний заалтыг дагаж мөрдөнө гэж заасан байгаа. Өөрөөр хэлбэл, өчигдрийн өргөн барьсан хууль нь олон улсын гэрээний дээгүүр үйлчлэх эрхгүй хууль болох юм. Хэрэв Монгол Улсад цөмийн хаягдлыг хаяхгүй байх тухай заах юм бол өнөөдрийн өргөн барьсан хууль Олон улсын гэрээнээс давж үйлчлэхгүй гэсэн үг юм. МАН-ын бүлгийн гишүүд олон нийтийн байгууллага, ард иргэдийн хүсэлтийг нухацтай хэлэлцье, хаврын чуулганаар хэлэлцэх нь зүйтэй гэж үзэж байна. МАН-ын гишүүд цөмийн хаягдал, ашигласан түлж, цацраг идэвхт бодисыг Монголд булшилна гэж зүтгээд байгаа зүйл байхгүй. Нэгэнт үүссэн нөхцөл байдал дээр үнэлэлт дүгнэлт өгч хэлэлэхийг хүсч байхад яааруулаад байгаа нь хардлага төрүүлж байна