Намын жагсаалтыг халсан Цэцийн дүгнэлтийг хүлээж авснаар Сонгуулийн хуулийн зарим заалтыг УИХ өөрчилж баталлаа. Үүнтэй холбоотойгоор намуудын нэр дэвшигчээ тодруулах хугацааг энэ сарын 23-наас гэж товлов. Сонгуулийг жижиг 76 тойргоор явуулах болсон тул намууд 76 нэр дэвшигч тодруулна. Энэ удаагийн нэр дэвшүүлэлтийн хамгийн онцлог нь намынхаа төлөөллийн байгууллагаас, тухайлбал МАН гэхэд Бага хурлаасаа, АН бол ҮЗХ-нхоо олонхийн санал авч чадсан нь нэр дэвших эрхтэй болох юм. Санал хураалтыг нууцаар явуулахыг анх удаа хуульчилсан. Хэрвээ олонхийн санал аваагүй бол нэр дэвших эрхгүй. Тийм учраас намуудын дотор, ялангуяа олон фракцын нэгдэл, дээр нь хэд хэдэн жижиг намыг албан бусаар нэгтгэж байгаа АН-ын нэр дэвшүүлэлт хамгийн сонирхолтой болно. Магадгүй, 2-3 мандатын наймаагаар намаа орхиод ирж байгаа МҮАН, ИЗНН-ын нэр дэвшигчдийг АН-ынхан ҮЗХ-ныхоо хурал дээр унагаж ч магадгүй юм. Угаасаа 76 мандат АН-ынханд өөрсдөд нь багадаж цөөдөж байгаа юм.