Төрийн орон сууцын корпораци /ТОСК/ түрээсийн орон сууцанд орох хүсэлтэй иргэдийг энэ сарын 15-ны өдрөөс ажлын тав хоногийн хугацаанд бүртгэхээ мэдэгдээд байгаа билээ. Иргэдийг бүртгэж дууссаны сугалаа явуулж, түрээсийн орон сууцанд орох иргэдийг сонгохоор тооцжээ. Түрээсийн орон сууцны хөтөлбөр хэрэгжиж эхлэхтэй холбогдуулан иргэдийг түрээсийн орон сууцанд хамруулах журмын талаар дэлгэрэнгүй мэдээлэл бэлтгэлээ.

Улаанбаатар хотын хэмжээнд түрээсийн орон сууцанд хамруулах иргэдийг бүртгэх, хамруулах ажлыг Төрийн орон сууцны корпораци хариуцах бол хөдөө орон нутагт аймаг, нийслэлийн Засаг даргын тамгын газар зохион байгуулахаар журамласан байна.

Түрээслэгч иргэний төрийн болон орон нутгийн өмчийн түрээсийн орон сууцад амьдрах хугацаа тав хүртэлх жил байх юм байна. Иргэд түрээсийн орон сууцны хөтөлбөрт хамрагдахдаа болзошгүй эрсдэлийг тооцож гурван сарын түрээсийн төлбөртэй тэнцэх барьцааг гэрээлэгч талд төлөх ёстой юм байна. Ойролцоогоор 420-840 мянган төгрөгийг төлнө.

Түрээсийн байрны төлбөр 140-280 мянган төгрөг байна

Түрээсийн нэг сарын төлбөрийг орон сууцны нийт талбайн хэмжээ, өрөөний тооноос хамааруулан нийслэлд 200-280 мянган төгрөг, орон нутагт 140-230 мянган төгрөг байхаар Засгийн газраас тогтсон.

Түрээсийн орон сууцанд хамрагдах иргэдэд тавих шалгуур

• Эрхзүйн бүрэн чадамжтай, 21 насанд хүрсэн байх,
• Тухайн орон нутагт түр буюу байнга оршин суудаг
• Тогтмол орлоготой байх, орлого нь түрээсийн барьцаа, түрээсийн барьцаа, түрээсийн төлбөр болон сууцны ашиглалтын зардлаа төлөх боломжтой байх
• Гэр хороололд амьдардаг, үндсэн өмчлөгчийн хувиар өөрийн өмчлөлийн инженерийн бүрэн хангамжтай орон сууцгүй байх

Түрээсийн орон сууцанд хамрагдах иргэдийн бүрдүүлэх материал

• Иргэний цахим үнэмлэхний хуулбар
• Оршин суугаа хаягийн болон ам бүлийн талаарх тодорхойлт /тухайн баг, хороонд хэдэн жил амьдарч байгааг тодорхойлсон байна/
• Өргөдөл хүссэн маягт
• Сарын орлого тодорхойлох бичиг баримт /нийгмийн даатгалын дэвтэр, хувиараа хөдөлмөр эрхэлдэг бол орлогыг нотлох баримт/-ын хуулбар
• Өөрийн эзэмшлийн орон сууцгүй болохыгг тодорхойлсон эрх бүхий байгууллагын лавлагаа

Түрээсийн орон сууцанд хамруулах журмыг дороос дэлгэрэнгүй харна уу.