НҮБ-ын Аюулгүйн зөвлөл тав дахь удаагийн цөмийн туршилтаа хийсэн БНАСАУ-д эдийн засгийн шинэ хориг арга хэмжээ авахаар өнгөрсөн арваннэгдүгээр сард тохирч, тогтоол гаргасан юм. Эдийн засгийн шинэ хориг арга хэмжээнд Хойд Солонгосыг гарах гарцгүй болгох нэгэн заалт байсан нь тус улсын экспортын орлогыг 62 хувь буюу 800 сая ам.доллараар бууруулах тухай юм. Өөрөөр хэлбэл, Хойд Солонгосын цөмийн хөтөлбөрийг хэрэгжүүлэх гол орлого болдог экспортын гол бүтээгдэхүүн болох нүүрс, төмрийн хүдрийн экспортод хориг тавихаар болсон билээ. НҮБ-аас гаргасан тогтоолд зааснаар БНАСАУ-ын нүүрсний орлогыг 62 хувь бууруулж, жилд 7.5 сая тонн, 400 сая ам.доллараас давсан хэмжээний нүүрс экспортлохыг хориглосон юм. Мөн зэс, никель, мөнгө, цайр экспортлохыг хоригложээ. Ингэснээр Хойд Солонгосоос нүүрс худалдан авдаг улс орнууд импортын хэмжээгээ бууруулж, тус улсын экспортын гол орлогод дарамт үзүүлж эхэлсэн билээ. Хятад улс бол Хойд Солонгосын нүүрсийг худалдан авдаг гол улс. 2016 оны эхний арван сарын байдлаар Хойд Солонгосоос 18.6 сая тонн нүүрс импортолж, тус улсад нийт нэг тэрбум ам.долларын орлого оруулсан байгаа юм. Харин НҮБ-ын шинэ тогтоолын дагуу БНХАУ тус улсаас импортолдог 18.6 сая тонн нүүрсний хэмжээгээ хязгаарлахаар болсон. Өөрөөр хэлбэл, БНХАУ Пхеньянаас авах импортоо бүрэн зогсоосноор Хятад улсад наанадаж 18 сая тонн нүүрсний импорт эзгүйрч үлдсэн юм. Тэгвэл энэ хоосон үлдсэн орон зайг нөхөх боломж Монгол Улсад бий болоод байгаа юм. Гэхдээ БНХАУ-д экспортлох нүүрсний орлогыг нэмэгдүүлэхийн тулд дэд бүтэц шаардлагатай болох нь мэдээж.  “Ройтерс” агентлаг 2017 оны эхний таван сарын байдлаар Монголын нүүрсний экспортын орлого өссөнийг Хойд Солонгост тавьсан хоригтой холбоотойгоор ийнхүү тайлбарлажээ.

Ройтерс: Хойд Солонгост тавьсан хоригийн дараа Монголын нүүрсний экспорт өсчээ

Энэ оны эхний таван сарын байдлаар Монгол Улсын нүүрсний экспортын орлого бараг тав дахин нэмэгдсэн талаар тус улсын Үндэсний статистикийн хороо мэдээлсэн байна. НҮБ-ын зүгээс Хойд Солонгост хориг тавьснаар Монголын нүүрсний хамгийн том хэрэглэгч болох БНХАУ руу хийх тээвэрлэлт нэмэгдсэн байна.

Түүхий эдийн үнэ буурч, нүүрсний эрэлт хэрэгцээ буурч, хөрөнгө оруулалт уналтад орсны улмаас бэлэн мөнгөний гачигдалд орсон Монгол Улс энэ жил Олон улсын валтын сангаас дэмжлэг хүссэн юм. Хэдий Хойд Солонгосоос нүүрс импортлохыг хориглосон НҮБ-ын шийдвэрийн үр шимийг хүртээд байгаа ч, ОУВС-гийн хөтөлбөрийн дагуу Хятадаас өөр нүүрсний нийлүүлэгчийг хайж олох хэрэгтэй болоод байна.

Монгол Улсын нүүрсний экспорт 2017 оны эхний таван сард 1.01 тэрбум ам.долларт хүрсэн нь өнгөрсөн оны мөн үетэй харьцуулбал 4.6 дахин өссөн үзүүлэлт юм. Тус улсын статистикийн албаны мэдээлснээр экспортын орлого нэмэгдэж, улмаар Монгол Улсын гадаад худалдааны тэнцэл 69.5 хувиар өсч, нэг тэрбум ам.долларт хүрчээ.

БНХАУ-ын гаалийн байгууллагын сүүлийн үеийн мэдээллээс үзэхэд энэ оны эхний дөрвөн сарын байдлаар Монгол Улс 11.7 сая тонн хүрэн нүүрс нийлүүлсэн нь өмнөх оны мөн үеийнхтэй харьцуулахад хоёр дахин өссөн үзүүлэлт болж байгаа бөгөөд энэ төрлийн нүүрсний хоёрдахь том нийлүүлэгч болжээ.

Өнгөрсөн дөрөвдүгээр сард Хятадад нийлүүлсэн Монголын нүүрсний дундаж үнэ нь 66 ам.доллар байсан бол мөн үед Австралийн тонн тутмын тээвэрлэлт дунджаар 122 ам.доллар буюу Монголынхоос хоёр дахин үнэтэй байсан юм..

Түүнчлэн Монгол Улсын гол металлын экспорт, түүний дотор зэсийн орлого 2017 оны эхний таван сарын байдлаар 58.8 ам.доллараар өсч, 41.3 сая ам.долларт хүрсэн байна. Үүнээс гадна энийт экспорт 42 хувиар өсч, 2.5 тэрбум ам.долларт хүрчээ.

Монголын хамгийн том зэсийн уурхай Оюутолгойн ордын олборлолт жилийн эхний хагасын байдлаар өнгөрсөн оны мөн үетэй харьцуулахад 5.7 хувиар өссөн нь зэсийн баяжмалын борлуулалтаас давсан үзүүлэлт болж байгаа аж.