Улаанбурхан өвчний өвчлөл газар авч байгаатай холбогдуулан Засгийн газар 948.3 сая төгрөгийн үнэ бүхий 624 мянган тун вакцин авсан. Энэ сарын 5-нд улаанбурханы вакцинийг ХӨСҮТ-ийнхөн хүлээн авсан бөгөөд вакцинжуулалт энэ сарын 12-25-нд орон даяар хийгдэх юм байна.

Тодруулбал, энэ сарын 12-ны өдрөөс эхлэн орон даяар 529 нэгжээр дамжуулан улаанбурханы вакцинжуулалтыг байнгын цэг, түр цэг, явуулын цэг гэсэн гурван зохион байгуулалттайгаар хийх юм байна. Байнгын цэг нь вакцин хийдэг томоохон өрхийн эмнэлгүүдэд байрлах бол түр цэг нь албан байгууллага, сургуулиудад очиж вакцин хийнэ. Харин явуулын цэг нь вакциндаа хамрагдахгүй байгаа айлуудад очиж хийх аж. Байнгын цэгүүд 14 хоногийн турш ажиллах юм байна. Албан байгууллагууд харьяа газрын эрүүл мэндийн байгууллагад очин вакцинжуулалтдаа хамрагдах боломжтойгоос гадна ажлын байран дээрээ вакцин хийх өрөө гарган түр цэгээр дамжуулан вакцин хийлгэх боломжтой юм байна.  Харин их дээд сургуулиудад эмчийн өрөөнд нь түр цэг байлуулан вакцинжуулалт хийнэ. 

Иргэд вакцинд хамрагдахаар ирэхдээ эрүүл мэндийн даатгалын дэвтрээ авч ирэх шаардлагатай юм байна. Тус дархлаажуулалтын вакциныг өмнө нь улаанбурхан тусч байсан хүмүүс ч хийлгэх ёстой юм байна. Харин жирэмсэн эмэгтэйчүүд дархлаажуулалтын вакцин хийлгэж болохгүйгээс гадна вакцин хийлгэснээс хойш сарын хугацаанд жирэмслэж болохгүй юм байна.