Сүмогийн Их аварга Д.Дагвадорж "Энэ сайн өдөр шоконд орохоор мэдээ сонслоо!!! Хятад иргэд Монголд 30 хоногийн хугацаанд визгүй зорчих болсон байна! 1сарын 5 наас!!!!!! " хэмээх постыг оруулжээ. Үүнтэй холбогдуулан олон нийтийн сүлжээгээр БНХАУ-ын иргэд Монголд 30 хоногийн хугацаанд визгүй зорчдог болсон талаар мэдээлэл тархаад байгаа юм. 

Харин энэхүү мэдээллийг Гадаад Харилцааны яамнаас үгүйсгэж, мэдэгдэл нийтэлжээ. 

Мэдэгдэлд "Олон нийтийн сүлжээгээр БНХАУ-ын иргэд Монгол Улсад 30 хүртэл хоног визгүй зорчино гэсэн мэдээлэл гарч байгаа нь ташаа мэдээлэл болохыг Гадаад харилцааны яам хариуцлагатайгаар мэдэгдэж байна. Гадаад улсын иргэдийг Монгол Улсын визээс чөлөөлөх асуудлыг олон улсын гэрээгээр шийдвэрлэх хуулийн зохицуулалттай бөгөөд хятад иргэдийг визгүй зорчуулах талаар Засгийн газраас ямар нэг шийдвэр гараагүй болно. Хоёр улсын иргэд харилцан зорчих асуудлыг Иргэд харилцан зорчих нөхцөлийн тухай Монгол, Хятадын хооронд 1989 онд байгуулсан хэлэлцээрийн дагуу зохицуулдаг бөгөөд энгийн паспорттай хятад иргэд Монгол Улсын виз авах шаардлага хэвээр мөрдөгдөж байна.

Сүүлийн үед зарим хувь хүмүүс олон нийтийн сүлжээг ашиглан гадаад бодлого, хоёр улсын харилцаатай холбоотой асуудлаар хариуцлагагүй, худал мэдээлэл түгээж, улмаар ард иргэдийг бухимдуулах, хоёр улсын харилцаанд сэв суулгаж болзошгүй мэдэгдэл хийж байгаа тул иргэд та бүхэн эдгээр мэдээллийг сайтар нягталж, зөвхөн албан ёсны эх сурвалжийн мэдээлэлтэй танилцаж байхыг хүсье" гэжээ. 

Тиймээс иргэд олон нийтийн сүлжээгээр тархаж буй мэдээлэлд хандахдаа зөвхөн албаны эх сурвалжийн мэдээллийг нягтлан үзэж, итгэж байхыг анхааруулж байна.