Ашиглалтын хугацаа нь дууссан тээврийн хэрэгслийг нийтийн тээврийн үйлчилгээнээс хасах журамын дагуу нийслэлийн нийтийн тээвэрт үйлчилж байгаа 390 орчим микро автобусны 37-гоос бусад нь ирэх сарын 1-нээс эхлэн нийтийн тээврийн үйлчилгээнээс гарах болжээ.

Манай улсад зорчигчдыг аюулгүй байдал, тав тухтай зорчуулах үүднээс 12 жилээс дээш насжилттай тээврийн хэрэгслийг нийтийн тээвэрт явуулахгүй гэсэн стандарт байдаг аж. Энэ стандартын дагуу нийтийн тээвэрт үйлчилж байгаа микро автобуснуудын ихэнх нь ашиглалтын хугацаа дуусчээ. Тодруулбал, нийслэлийн нийтийн тээвэрт үйлчилгээнд явж буй ихэнх микронууд 2003 онд үйлдвэрлэгдсэн бөгөөд ашиглалтын хугацаа нь дуусч байгаа учраас ирэх гуравдугаар сарын 1-нээс эхлэн үйлчилгээнд явуулахгүй юм байна. Нийтийн тээврийн хүрэлцээ муутай нийтийн тээврээс 360 орчим микро автобусыг хасахаар хүндрэл үүсэх магадлалтай учраас Нийслэлийн тээврийн газраас Нийслэлийн мэргэжлийн хяналтын газарт микро автобуснуудыг зогсоох, хугацааг сунгах хүсэлт явуулжээ. Харин Нийслэлийн мэргэжлийн хяналтын газраас Стандартчилал хэмжил зүйн газарт ханд гэсэн хариу өгсөн байна. Гэтэл Стандартчилал хэмжил зүйн газар микроны ашиглалтын хугацааг сунгах боломжгүй, гэрээн дээрээ өөрчлөлт оруулаад зохицож ажиллаж болно гэсэн санал ирүүлжээ. Тиймээс Нийслэлийн тээврийн газрын удирдлагын зөвлөл хуралдаж аж ахуйн нэгжүүдтэй хийсэн гэрээгээ наймдугаар cap хүртэл сунгажээ. Нийтийн тээврийн үйлчилгээнээс гарах 360 гаруй микро автобусны оронд ямар автобус үйлчилгээнд гаргахыг одоогоор шийдээгүй байгаа аж.

Нийслэлийн тээврийн газрын ЗТҮХ-ын дарга Г.Доржпалам "Зорчигч тээврийн үйлчилгээний стандартад үйлдвэрлэснээс хойш 12-оос дээш жил болсон тээврийн хэрэгсэл ашиглахыг хориглодог. Одоо нийслэлд үйлчилгээнд явж буй микронуудын хамгийн сүүлийнхийг нь 2003 онд үйлдвэрлэсэн ашиглалтын хугацаа дуусч байгаа тул ирэх сарын 1-нээс үйлчилгээнд явахгүй. Зам тээврийн яам болон Нийслэлийн Мэргэжлийн хяналтын ерөнхий газар, Стандарт хэмжил зүйн газраас "Стандартаа дагаж мөрдөх, ашиглалтын хугацаа дууссан тээврийн хэрэгслийг үйлчилгээнээс хас гэсэн чиглэл өгч байгаа. Тиймээс ирэх сараас эхлэн манайд бүртгэлтэй байгаа 390 микро автобусаас хасагдаад 37 микро автобус үлдэнэ" гэлээ.