Хөдөлмөрийн үндэсний намын ээлжит бус их хурал өчигдөр эхэлж өнөөдөр 11:00 цагт үргэлжилнэ. Ээлжит бусаар хуралдаж байгаа их хуралд 21 аймаг, есөн дүүргийн намын анхан шатны хороодын дарга, тэргүүлэгч, гишүүд болох 342 төлөөлөгч оролцож, намын удирдлага, анхан шатны хороодын дарга, гишүүд намын төв хороогоо байгуулах асуудлыг хэлэлцэж, тодорхой шийдэлд хүрчээ. 

Харин өнөөдөр үргэлжлэх их хурлаараа намын шинэ даргыг томилохоос гадна хоёр дэд даргаа томилох юм. УИХ-ын гишүүн С.Ганбаатар Хөдөлмөрийн үндэсний намын дарга болох тохироо хэдийнэ хийгдсэн бөгөөд дэд даргаар нь одоогийн намын дарга С.Боргил болон Монголын банкны холбооны гүйцэтгэх захирал Б.Найдалаа нар томилогдох бөгөөд өнөөдөр 11:00 цагт үргэлжлэх хурлаараа баталгаажуулах юм байна.

 2012 оны сонгуульд Дархан-Уул аймагт нэр дэвшиж УИХ-ын гишүүн болсон С.Ганбаатар өнгөрсөн оны арванхоёрдугаар сарын 29-нд ХҮН-д элссэн. УИХ-ын гишүүн тус намд элссэнээр парламентад суудалтай нам болсон. ХҮН шинэчлэгдсэн гэдгээ зарлаж байхад УИХ-ын гишүүн С.Ганбаатар ХҮН-ыг байгуулж 2017 оны Ерөнхийлөгчийн сонгуульд нэр дэвшинэ гэсэн таамаг гарч байв. Тэрээр ХҮН-д албан ёсоор гишүүнээр элсээгүй байхдаа ч хэдийнээ тус намын ажлаар хөдөө орон нутагт ажиллад эхэлсэн билээ.

Дашрамд сонирхуулахад, ХҮН-ын дарга С.Боргил намаа шинэчлэн байгуулж байгаа гэдгийг зарлахдаа өөрийгөө Засгийн газарт Оюутолгойн асуудлаар санхүүгийн зөвлөх хийдэг хэмээн танилцуулж байсан. Гэтэл тус намын лидерийн ярьдаг, шүүмжилдэг ганц сэдэв нь Оюутолгой. Тэрээр "Оюутолгойн гэрээнд оролцсон бүх хүнтэй хариуцлага тооцох ёстой" гэдэг. Тэгэхээр үзэл баримтлалын зөрүүтэй хоёр хүн ХҮН-ыг удирдах нь.