МАХН-ын дарга Н.Энхбаяр намаасаа гарч АН-д элсэнэ гэсэн мэдээлэл гараад байгаа. Тодруулбал, МАХН-ын дарга Н.Энхбаяр намаа санхүүжүүлэхээ больсон, МАХН орон нутгийн сонгуульд ч оролцохгүй гэсэн мэдээлэл гараад байгаа. Энэ талаар УИХ-ын гишүүн О.Баасанхүүгээс тодрууллаа.

-Танай намын дарга Н.Энхбаярыг намаасаа гарч АН-д элсэнэ гэсэн мэдээлэл гараад байна. Ийм асуудал яригдаж байгаа юу?

-Би Н.Энхбаяр гэдэг хүний өмнөөс намаасаа гарна, гарахгүй гэж яримааргүй байна. Гэхдээ нам дээр Н.Энхбаяр дарга намаасаа гарна гэсэн асуудал огт яригдаагүй. Н.Энхбаяр даргыг Солонгосын иргэншилтэй болно гээд л бичээд байсан худлаа байсан шүү дээ. Тэгэхээр иймэрхүү мэдээлэл гаргах нь юу ч биш байх. Ер нь тэд өнгөрсөн 90 жил МАХН-ыг арчиж чадаагүй, цаашдаа ч чадахгүй. Нам хэвийн үйл ажиллагаатай байгаа.

-МАХН-ын дарга Н.Энхбаяр намаа санхүүжүүлэхгүй байгаа гэсэн ч мэдээлэл байна. Энэ үнэн үү?

-Намыг намын дарга санхүүжүүлдэггүй. Харин намын гишүүд, дэмжигчдийн хандиваас санхүүжүүлдэг.

-МАХН 2017 оны Ерөнхийлөгчийн сонгуульд оролцох уу?

-Хуулиар парламентад суудалтай улс төрийн хүчин Ерөнхийлөгчийн сонгуульд оролцох эрхтэй байдаг. Энэ утгаараа МАХН Ерөнххийлөгчийн сонгуульд оролцох эрхтэй. Гэхдээ хэн ч Ерөнхийлөгчийн сонгуулийн талаар яриагүй байна. Ямар ч байсан намрын чуулган ороод ирэх оны төсвөө батлаад, шинэ он гараг. Түүний дараа шинэ он гарахаар л энэ асуудал яригдах байх. Гэхдээ Н.Энхбаяр дарга нэр дэвшихгүй байлаа гээд өөр хүн нэр дэвшиж болно шүү дээ. МАХН-д ганцхан Н.Энхбаяр гэж хүн байгаа юм биш шүү дээ. Дэвших сонирхолтой олон хүн байгаа. Гэхдээ энэ бүхнийг ярихад эрт байна.