Дэлхийд нэр нөлөө бүхий алдартнууд бусад алдартнуудынхаа талаар бичиж нийтэлснийг хүргэж байна. 

Пап лам I Францисын тухайд Барак Обама:

Ёс суртахууны удирдагч

Хүмүүс биднийг илүү сайн сайхан амьдраасай гэж хүсдэг удирдагч ховор. Харин пап лам Францис бол тийм удирдагч. Гэгээнтний хэлсэн үг, үйлдэл бидэнд ялангуяа ядуу, эмзэг давхаргынханд илүү хүрдэг. Ховор тохиолдох өвчтэй хүмүүстэй уулзаж, залуу хоригдлуудын хөлийг угааж, орон гэргүйчүүдийг тэтгэсэн нь бид бүхэнд илүү нөлөөлж чадсан. Тэрээр бидэнд амьдрал дээрх үнэн дүр зургийг үгээр хэлэхээс гадна, хүмүүс бид ёс суртахууны үүргээ биелүүлэхгүй байгааг сануулдаг. Тухайлбал, ядуурлыг бууруулах, тэгш бус байдлыг багасгахын тулд энхтайвныг дэмжиж, өвчтэй хүмүүсийг гадуурхалгүй асарч, орон гэргүй хүмүүст тусалж, бусдад үргэлж шинэ үүд хаалга нээж өгөх зэрэг сайн үйлсийг амьдралдаа өдөр тутам хэвшүүлж, хүн болгон хийж чадах боломжийнхоо хэрээр хичээл зүтгэл гаргах хэрэгтэйг тэрээр бидэнд сануулдаг. Бид бас түүний даруу төлөв байдлаас суралцах хэрэгтэй болов уу.

Жон Керригийн тухайд Хиллари Клинтон:

Няцашгүй хэлэлцээрч

Дипломат байдал бол Жон Керригийн цусанд байдаг чанар. Дипломат ажилтны хүү байхдаа л тэрээр АНУ-ын хувь заяа өргөн уудам дэлхийтэй салшгүй уялдаа холбоотой гэдгийг ойлгож өссөн. Дипломатч хүн гэдэг тэсвэртэй, хүсэл тэмүүлэлтэй, санаачилгатай, алсыг хардаг байх ёстой. Харин Жонд эдгээр зан чанар бүгд байдаг. Ойрхи Дорнодод энх тайван байдлыг тогтоох, Украины эсрэг ОХУ-ын хэрэгжүүлж буй түрэмгийллийг зогсоох, Сириэс химийн зэвсгийг гаргах хэлэлцээр, Ираныг цөмийн тохиролцоонд гарын үсэг зуруулахаар ятгасан гээд тэр бол байнгын саад бэрхшээлд няцашгүй, мохошгүй байх “нүүр царай” болсон хүн. Мөн цаг уурын өөрчлөлтийн эсрэг тэмцдэг түүний хүчин чармайлтыг мартаж болохгүй. Дэлхийн дулаарлын улмаас учирч болох аюулыг анхаарлын төвд авчирч, түүний эсрэг тэмцэх нь Жон Керригийн хувь хүний амлалт. Би өөрийн туршлагаасаа түүний ажил ямар хэцүү гэдгийг сайн мэднэ. АНУ-ын ард түмэн түүнийг АНУ-ын гадаад дахь ашиг сонирхлыг төлөөлж байдагт баяртай байдаг биз ээ. Би ч мөн ялгаагүй.

Си Зиньпинийн тухайд Жон Хантсмэн:

Хятадын тэргүүлэгч

Си Зиньпин бол Дэн Сяопиноос хойш улсдаа хамгийн их өөрчлөлт хийсэн БНХАУ-ын удирдагч. Түүний тогтвортой хэв маяг түүнд итгэх итгэлийг төрүүлдэг. Дэлхийн удирдагчдын талаархи ойлголтыг өөртөө төвлөрүүлж чаддаг нэгэн. Түүний явуулж буй бодлого, үйл ажиллагаа тус улсыг дэлхийн зах зээлд өрсөлдөх дээд зэргийн чадвартайг харуулж байна. Си Коммунист намд тархаж, бугшсан бичигдээгүй дүрмийг эвдэж, улс төр бол айлган сүрдүүлэлт биш гэдэг байр суурь баримталдаг. Түүний чөлөө завгүй байдал дотоодыг эв нэгдлийг бэхжүүлж, Хятад улсыг дэлхийн шийдвэр гаргагчдын ширээний ард авчирч чадсан. Тэрээр энэхүү хүндтэй албыг хаших арван жилийн хугацаандаа зуун зууны турш Хятадын тэмцэж ирсэн эв нэгдлийг бий болгосон хэмээн дэлхийд хүлээн зөвшөөрөгдсөн Хятадын анхны тэргүүлэгч болох нь гарцаагүй. Түүний удирдлага дор Хятад улс АНУ-ын хамгийн том сорилт байж, XXI зууны шинэ үеийн Дундад иргэн улс болно гэж би боддог.

Жон Хантсмэн өмнө нь Хятад дахь АНУ-ын Элчин сайдаар ажиллаж байсан бөгөөд 2012 оны сонгуульд Бүгд найрамдах намаас Ерөнхийлөгчид нэр дэвшихээр өрсөлдөж байсан юм.

Шинзо Абэгийн тухайд Жэк Лиу:

Азийн зоригтой шинэчлэгч

Японууд эдийн засаг нь ид унаж байх үед эдийн засгийг сэргээх хамгийн шилдэг арга бол Шинзо Абэг Ерөнхий сайд болгох гэж хэлэх байсан биз ээ. Тэрээр 2007 онд эрүүл мэндийн байдлын улмаас ердөө 365 хоног л Ерөнхий сайдаар ажиллаад сайн дураар огцорсон байдаг. Харин дараа нь тэрээр эргэн ирж, уналтад ороод байсан Японы эдийн засгийг сэргээх багц төлөвлөгөөг боловсруулсныг одоо бид Абэномикс гэж нэрлээд буй. Хэрэглээний зардлыг багасгаж, эдийн засгийг эрчимтэй нөхөн сэргээх Абэгийн бодлого ердөө 20 сарын дараа японуудын нүдэнд итгэлийн гал асааж, түүнд итгэх шалтгааныг бий болгосон. Ази, Номхон далайн орнуудын далайн худалдааны хэлэлцээр, бусад бүтцийн тогтвортой шинэчлэл, урт хугацааны дотоодын эрэлт өсөлтийг хангах гээд түүний амжилт дуусашгүй.

Лиу нь АНУ-ын Сангийн нарийн бичгийн даргаар ажиллаж байна.

Барак Обамагийн тухайд профессор Лорэнс Клэйн:

АНУ-ын Ерөнхийлөгч үүрэгт ажлаа хэтрүүлсэн байж магадгүй

Энэ жил Ерөнхийлөгчийн хувьд тун хатуу, харш жил болж байна. Түүний бодлого ялангуяа гадаад үйл ажиллагаанд баримталж буй бодлого маш хатуу. Гэхдээ аливаа гамшигт үзүүлэх хариу үйлдлийн гүйцэтгэл нь унтаа хэвээр л байна. Харин Ойрхи Дорнод болон Сирийн хэрэгт хөндлөнгөөс оролцохгүй хичээж байсан нь ухаалаг алхам байсан ч Владимир Путиний үйлдлүүдийг бараг л дуугүй харж суугаагаас нь эхлээд хоосон яриа нь бусдыг эргэлзүүлэхэд хүргэж байна. Гэвч бидний 66 хувь нь одоог болтол түүнд итгэсээр л байна. Түүнд үүнийгээ нөхөж ажиллах хугацаа байна.

Ким Чен Уны тухайд зохиолч Адам Жонсон:

Хойд Солонгосын идэвхтэй удирдагч

Хүн төрөлхтөний түүхэн дэх дарангуйлагчдын нэг гэгддэг Ким Чен Ирийн суудлыг залгамжлан авсан Ким Чен Ун удирдагч болсон эхний жилдээ л улсынхаа “өргөс”-үүдийг түүж эхэлсэн. Тэрээр хээрийн сургуулилт, баярын жагсаал гээд олон зүйлээр өөрийн иргэдийг өөртөө татаж чадсан. Мөн 2013 оны эхээр цөмийн туршилт явуулсан нь дэлхийг туршсан үйл явдал болсон юм. Түүнийг улсын удирдагч болоход олон хүн Хойд Солонгос шинэ үе рүү шилжих нь хэмээн найдаж байсан. Гэвч АНУ-ын Үндэсний сагсан бөмбөгийн тамирчин асантай хөгжилдсөн зэрэг нь улсынх нь зарим хүн амьдрах орон сууцгүй байхад хэтэрхий үрэлгэн үе ирж байна гэх таамгыг төрүлсэн. Хамгийн чухал нь Кимийн үед мөнхийн сэдэв байсаар ирсэн “Ард түмэн хэр их зовлонг тэсвэрлэж чадах вэ” гэх нэн ядуу иргэдийнх нь асуулт Ким Чен Уны үед ч хэвээр л байсаар байна. Харин залуу генералын хувьд тэрээр ард түмэндээ санаа тавьж эхэлбэл дэлхий хүлээн зөвшөөсөн БНАСАУ-ын анхны удирдагч байх болно.

Хиллари Клинтоны тухай Малала Юсуфзай:

Эмэгтэй удирдагчдыг дэмжигч эмэгтэй удирдагч

Хиллари Клинтон бол дэлхий даяар эмэгтэйчүүдийн хувьд хүч чадлын бэлгэдэл юм. Түүний хэлсэн маш алдартай нэг үг байдаг. “Эмэгтэйчүүдийн эрх бол хүн төрөлхтөний эрх” гэж. Тэрээр энэ үгийг зүгээр ч нэг хэлээгүй. Тэрээр улс төр, буяны үйлсээр дамжуулан дэлхий даяар эмэгтэйчүүдэд амьдрах итгэл найдвар, урам зориг өгсөн. Намайг халдлагад өртсөний дараа хатагтай Клинтон зоригжуулж, урамшуулах эх булаг нь болж өгсөн. Тэр үед Хиллари надад “Хүчтэй байж өөрийн хүсэл зорилгоо үргэлжлүүлээрэй. Бид чамд итгэж байна” гэж хэлсэн. Түүний амьдрал, манлайлал эмэгтэйчүүд бидэнд өөрсдийн хүч чадалд итгэж, нинжин сэтгэлтэй байж, өөрийн хүрэх замыг тодорхойлж хүрэх боломжтой эцсийн цэгтээ хүрэхийн тулд тэмцэх ёстойг харуулдаг. Эмэйгтэй удирдагчид дэлхийг улам сайхан болгоно. Хатагтай Клинтон тэдний нэг.

Ангела Меркелийн тухайд Юрген Клинсман:

Германы хувьсгалч

2006 онд болсон Дэлхийн аваргад гүйцэтгэсэн түүний үүрэг Ангела Меркелийн карьер дахь хамгийн түүхэн үйл явдал гэж би хувьдаа боддог. Тухайн үед Дэлхийн аваргыг зохион байгуулсан Германы хувьд түүхэн бараан сүүдрээсээ гарч чадсан, эсэхээ дэлхийд таниулах чухал мөч байсан. Бидэнд залуу, эрч хүчтэй, шийдэмгий “Герман бус” баг л байсан. Гэвч тэрээр биднийг эмх цэгцэнд оруулж, зохион байгуулж, бидэнд өөрсдийн соёлын дүр төрхийг харуулсан чөлөөт, бүтээлч, эрх хүчтэй баг болоход тусалсан. Бид түүний энэ өвөрмөц, шинэ хандлагыг хүлээж авснаар амжилт үзүүлж чадсан. Энэ нь хожим манай үндэстний хойч үедээ харуулах бахархлын нэг болж чадсан. Меркель шилжилтийн үед удирдагч болсон нь эмэгтэй хүний хувьд тун хүнд сорилт. 2006-2007 оны санхүүгийн хямралын үед тэрээр Европын эдийн засгийг аврахын тулд өөрчлөлт оруулах шаардлагатайг үл итгэгчдэд ойлгуулж чадсан. Түүний гавьяа бол нэгэн дор хөлбөмбөгийн ногоон талбайд ч тэр дэлхийн тавцан дахь Германы нэр хүндийг эргүүлэн авчирч, одоог болтол хадгалж байгаа юм.

Клинсман нь АНУ-ын эрэгтэй хөлбөмбөгийн багийн дасгалжуулагч бөгөөд 2006 онд Германы багт тоглож байсан юм.