Ерөнхийлөгч У.Хүрэлсүхийн санаанд оромгүй шийдвэрийн үр нөлөөгөөр Ерөнхийлөгчийн сонгууль хугацаанаасаа өмнө буюу дөрвөн сарын дотор болохоор боллоо. Нам, эвсэл бүхэнд Ерөнхийлөгчийн сонгуульд өрсөлдөх хүсэлтэй горилогч олон бий. Тэр дундаа 105 жилийн түүхтэй гэдэг эрх баригч МАН дотор Ерөнхийлөгчийн сонгуульд өрсөлдөх хүсэлтэй, цаашилбал Ерөнхийлөгч болох мөрөөдөлтэй хүнийг захаас аваад нэрлэж болно. Тэдний тэргүүн эгнээнд УИХ-ын дарга С.Бямбацогт нэрлэгдэж байгаа. Хэдийгээр тэрээр УИХ-ын даргаар сонгогдохдоо Ерөнхийлөгчийн сонгуульд нэр дэвшихгүй гэж намын удирдлагуудтайгаа тохирсон гэх боловч түүнээс хойш улс төрийн нөхцөл байдал алга урвуулсан мэт өөрчлөгдөж байна. Тэр дундаа УИХ-ын дарга С.Бямбацогтод ашигтай байдлаар өөрчлөгдлөө. Ерөнхийлөгч У.Хүрэлсүхийг чөлөөлсний дараа УИХ-ын дарга С.Бямбацогт Ерөнхийлөгчийн үүргийг давхар гүйцэтгэхээр Үндсэн хуульд заасан. Тиймээс тэрээр дөрвөн сарын хугацаанд Ерөнхийлөгчийн ажлыг хийнэ гэсэн үг. Энэ нь түүнд Ерөнхийлөгчийн сонгуульд Ерөнхийлөгчийн хувиар нэр дэвших боломжийг ч олгож мэднэ. Ерөнхийлөгчийн сонгуульд жижиг албан тушаалаас нэр дэвшүүлдэггүй жижиг аливаа эрх баригч намд бий. Энэ нь олонд танигдсан, нэр хүндтэй байх, сонгогдох магадлалыг нэмэгдүүлэх гээд олон төрлийн ач холбогдолтой биз ээ. Энэ утгаараа С.Бямбацогт дарга намынхнаасаа дэмжлэг авах, бусад өрсөлдөгчөөсөө давуу байдлыг бий болгож байна. 20 гаруй жил улс төрд явж, УИХ-ын дарга хүртэл дэвшсэн түүнд Ерөнхийлөгчийн суудал мөрөөдөлд нь бий. Тиймээс өөрт ирсэн энэ боломжийг атгаад авахын төлөө ч ажиллах биз ээ.