Монгол Улсын хэмжээнд 2026 оны эхний 10 сарын байдлаар аюулт үзэгдэл, ослын нийт 4456 тохиолдол бүртгэгджээ. Энэ нь өмнөх оны мөн үеэс 145 тохиолдлоор буюу 3.2 хувиар буурсан үзүүлэлт юм. Гэвч нийт тохиолдлын тоо буурсан хэдий ч хүний амь нас, эрүүл мэндэд учирсан хохирол болон эд материалын хохирлын хэмжээ өссөн байна. Тодруулбал, тайлант хугацаанд аюулт үзэгдэл, осолд 4821 хүн өртөж, 292 хүн амь насаа алджээ. Амиа алдсан хүний тоо өмнөх оны мөн үеэс 17-оор буюу 6.2 хувиар нэмэгдсэн байна.

Мөн аюулт үзэгдэл, ослын улмаас улс, иргэдэд нийт 79.3 тэрбум төгрөгийн шууд хохирол учирчээ. Энэ нь 2025 оны мөн үеийнхээс 29.5 тэрбум төгрөгөөр буюу 59.2 хувиар өссөн дүн юм. Хохирлын хэмжээг өмнөх онуудтай харьцуулбал 2024 оны эхний 10 сард 35.7 тэрбум, 2025 оны мөн үед 49.8 тэрбум төгрөгийн хохирол учирч байжээ. Бүртгэгдсэн аюулт үзэгдэл, ослыг гарал үүслээр нь ангилбал 93.9 хувь буюу 4182 нь хүний үйл ажиллагаатай холбоотой осол байна. Харин биологийн гаралтай аюулт үзэгдэл 131 буюу 2.9 хувь, ус, цаг уурын гаралтай аюулт үзэгдэл 99 буюу 2.2 хувь, геологийн гаралтай аюулт үзэгдэл 44 буюу нэг хувийг тус тус эзэлжээ.

Төрлөөр нь өмнөх оны мөн үетэй харьцуулахад биологийн гаралтай аюулт үзэгдлийн тохиолдол хамгийн их өссөн байна. Тодруулбал, хүн, мал, амьтны гоц халдварт өвчин, хортон шавж, мэрэгчийн тархалт зэрэг биологийн гаралтай аюулт үзэгдэл 2025 оны эхний 10 сард 29 удаа бүртгэгдэж байсан бол энэ онд 131 болж, 4.5 дахин нэмэгджээ.

Харин ус, цаг уурын гаралтай аюулт үзэгдэл 109-өөс 99, геологийн гаралтай аюулт үзэгдэл 57-гоос 44, хүний үйл ажиллагаатай холбоотой осол 4406-гаас 4182 болж тус тус буурсан байна. Ийнхүү 2026 оны эхний 10 сарын байдлаар аюулт үзэгдэл, ослын нийт тохиолдол өмнөх оны мөн үеэс буурсан ч хүний амь нас эрсэдсэн тохиолдол болон эд материалын хохирлын хэмжээ нэмэгдсэн юм.