Ардчилсан нам өчигдөр сайжруулсан шахмал түлшний угаарын асуудлаар мэдээлэл хийж, сүүлийн долоон жилд 900 гаруй иргэн угаартаж нас барсан ч хэн ч хариуцлага хүлээгээгүй гэдгийг онцлов. Түүнчлэн энэ онд анх удаа шахмал түлшний угаарын хэрэгт Улсын дээд шүүх (УДШ) иргэний талд шийдвэр гаргасныг дурдсан юм.

Уг хэргийн талаар УИХ дахь АН-ын хуулийн бодлогын зөвлөх Н.Ариунболд мэдээлэхдээ, “2019 онд угаартаж хохирсон нэг иргэн Эрүүгийн цагдаагийн албанд хандсан ч хэргийг хаасан. Ингээд тухайн иргэн иргэний журмаар явсан. Ингээд Улсын дээд шүүх уг иргэний асуудлыг хянан хэлэлцээ; (2026.05.05)-нд “Үүнд иргэн буруугүй. “Тавантолгой түлш” компани буруу үйлдвэрлэл явуулсан. Хохирлыг нь нөхөн төл” гэдэг шийдвэр гаргасан. Бүтэн 6 жил цагдаа, шүүхээр яваад 503 сая төгрөг эмчилгээний төлбөрт гаргуулахаар шүүх шийдвэрлэлээ”  гэсэн юм.

Бид уг хэргийн талаар Улсын дээд шүүхийн цахим мэдээллийн сангаас шүүж үзсэн юм. Дээд шүүх ямар хэрэг явдалд, ямар үндэслэл бүхий шийдвэр гаргасныг шалгалаа. 2019 оны намар шахмал түлш түлээд угаартаж, гурван настай охиноо алдаж, өөрөө хөгжлийн бэрхшээлтэй болсон эхийн зургаан жил үргэлжилсэн маргаан 2026 оны тавдугаар сард эцэслэн шийдвэрлэж, шүүх Тавантолгой түлш ХХК-ийг буруутай хэмээн үзэж нийт 503,083,426 төгрөг гаргуулахаар тогтоожээ.