Өмнөговь аймагт болсон “Ерөнхий сайдаас шууд асуу” уулзалтын үеэр шатахууны нийлүүлэлт, үнийн асуудлаар мэдээлэл өгөхдөө Ерөнхий сайд Н.Учрал бухимдан, иргэдийн асуултад ширүүн өнгө аястай хариулт өгсөн байна. Ерөнхий сайд хариулахдаа "Би дараа сард ямар байхыг ярьж байна шүү дээ. Би ямар бензин үйлдвэрлэж байгаа биш. Та нар жаахан амьдралтай юм ярь. Манай улс шатахуунаа 100 хувь импортоор авдаг. Та нар ингэлээ гээд юу өөрчлөгдөх юм” гэсэн юм.

Тэрээр “Бид эхлээд шатахууны хомсдолоос гаръя гэж зорьсон. Одоо хомсдолоос гарах шатандаа явж байна. Хомсдол арилж, нийлүүлэлт тогтворжсоны дараа татаас олгож, үнийг бууруулах дараагийн төлөвлөгөө рүү шилжинэ. Та бүхний яриад байгаа шатахуун нийлүүлдэг 5-6 компани даам гараад, дураараа үнэ нэмж, иргэдийг хохироож байна. Ийм нөхцөлд бензиний үнийг шууд чөлөөлөх тухай ярих боломжгүй. Зах зээлд бодит өрсөлдөөн бий болж байж хэрэглэгч хождог. Засгийн газар шатахуун оруулж ирэхэд нөгөө хэдэн компани нийлж байгаад үнээ нэмээд зарж байна.

Бид шатахууны савны асуудлыг шийднэ гэж хэлсэн. Хэлсэн ёсоороо савтай болсон. Мөн нийлүүлэлтийн эх үүсвэрийг олон болгоно гэсэн. Үүний үр дүнд БНСУ, БНХАУ-аас шатахуун авч байна. Анхнаасаа хэлж байсан. Эдгээр улсаас авч байгаа шатахууны үнэ ОХУ-аас авч байгаагаас хоёр дахин өндөр байна аа гэж. Би одоо хийсэн гэрээ, дараа сард хэрэгжүүлэх ажлынхаа талаар ярьж байна. Би ямар бензин үйлдвэрлэж байгаа биш. Бодит нөхцөл байдлаа ярьж байна. Та бүхэн ингэлээ гээд юу өөрчлөгдөх юм. Манай улс шатахуунаа 100 хувь гаднаас авдаг. Би энд нийлүүлэлтийн гэрээ хэлцэл хийж, асуудлыг шийдэхээр ажиллаж байна. Ирэх сараас эхлэн сард 90 мянган тонн шатахуун нийлүүлдэг болно. Бидний хувьд хамгийн түрүүнд нийлүүлэлтийн хомсдолоос гарах нь чухал. Үүний дараа шатахууны үнийг бууруулах асуудлаа ярьж, тодорхой арга хэмжээ авна” гэж хариулжээ.