Улаанбаатар хотын агаарын бохирдлыг бууруулах зорилгоор түүхий нүүрсийг хориглож, сайжруулсан шахмал түлш нэвтрүүлснээс хойш 7 дахь өвөлтэйгөө золгож байна. Энэ хугацаанд түлшний үнийг тогтвортой барих, үйлдвэрлэл, нийлүүлэлтийг тасалдуулахгүй, Улаанбаатар хотын гэр хорооллын айл өрхүүдийн түлшний зардлыг бууруулахын тулд улсын төсөв болон төрийн өмчит компаниудаас татаас олгож ирсэн. Өнөөдөр ч энэ байдал үргэлжилж буй. Гэвч нөгөө талд нийслэлийн агаарын бохирдол, угаарын хийн хордлого, түлшний үйлдвэрлэл, борлуулалтын алдагдал зэрэг асуудал бүрэн шийдэгдээгүй хэвээр л байна.

2019 оноос тухайн үеийн Ерөнхий сайд У.Хүрэлсүхийн санаачилгаар сайжруулсан шахмал түлшний хоёр үйлдвэр байгуулж түлшийг дотооддоо үйлдвэрлэж эхэлсэн. Тухайн үед нэг шуудай нүүрс үйлдвэрлэх өртөг 15000 төгрөг байсан ч айл өрхүүдэд 3750 төгрөгөөр боруулж эхэлсэн. Зөрүүг нь дээр хэлсэнчлэн улсын төсөв болон "Эрдэнэс Тавантолгой" ХК-иас олгож байсан билээ. Харин өнгөрсөн жилээс тус үйлдвэрээ ашиглахгүй БНХАУ-аас хагас коксжисон нүүрс худалдан авч хэрэглэж байгаа. Хагас коксжсон нэг шуудай нүүрсийг 5000 төгрөгөөр боруулж байгаа. Өнгөрсөн жил нэг тонн хагас коксын худалдан авах үнэ 738 мянга орчим байсан бол энэ жил 1.03 сая төгрөг болж, 40 хувиар өсжээ. Гэтэл иргэдэд нэг шуудайг нь 5000 төгрөгөөр буюу нэг тонныг ойролцоогоор 200 мянган төгрөгөөр борлуулж байгаа нь худалдан авах үнээс тав дахин бага үзүүлэлт юм. Үүний зөрүүг мөн л "Эрдэнэс Таюантолгой" ХК-иас гаргаж байгаа.

Инфляц 13 хувьд хүрч, шатахуун, өргөн хэрэглээний барааны үнэ өдөр өдрөөр нэмэгдэж байгаа энэ цаг үед үнэ нь олон жил хэвээр байгаа ганцхан зүйл бол гэр хорооллын айл өрхүүдийн хэрэглэж байгаа түлш. Өртөг нэмэгдэж байгаа ч үнийг тогтвортой барихын тулд "Эрдэнэс Тавантолгой" ХК-иас энэ жил ч 300,400 тэрбумаар нь татаас өгч байгаа. Өнгөрсөн хугацаанд тус компани нийслэлийн айл өрхийг хямд түлшээр хангахын тулд хоёр их наяд орчим төгрөг зарцуулсан.