Авлигатай тэмцэх газар, Цагдаагийн ерөнхий газар, Тагнуулын ерөнхий газрын хамтарсан мөрдөн шалгах ажлын хэсгийг Улсын ерөнхий прокурорын газрын шийдвэрээр зургадугаар сард байгуулагдсан. Тус ажлын хэсэг нийслэлд хэрэгжсэн томоохон төсөл, хөтөлбөрүүдтэй холбоотой авлига, албан тушаалын хэргүүдийг шалгаж байгаа юм. Тус ажлын хэсэг өнөөдөр олон нийтэд албан ёсны мэдээлэл өглөө. Энэ үеэр Мөрдөн шалгах хэлтсийн дарга, эрхэлсэн комиссар Х.Баянтүмэн болон Хяналт шалгалт, дүн шинжилгээний хэлтсийн дарга, эрхэлсэн комиссар Н.Дамдинсүрэн нар цаг үеийн асуудлаар мэдээлэл хийсэн юм.

Х.Нямбаатарт холбогдох 20 гаруй тендерийг хууль бусаар шалгаруулсан байж болзошгүй хэргийг шалгаж байна

Мөрдөн шалгах хэлтсийн дарга, эрхэлсэн комиссар Х.Баянтүмэн: Туулын хурдны зам төслийн гүйцэтгэгч компанид урьдчилгаа төлбөр болгон 500 тэрбум төгрөг олгохдоо Х.Нямбаатар хуулийн тодорхой заалтыг зөрчсөн байж болзошгүй. Тодруулбал, санхүүжилтийн гүйлгээ хийх эрхийг Т.Даваадалайд шилжүүлэхдээ хуульд заасан шаардлага хангаагүй, баталгаа гаргах эрхгүй хүнд эрх шилжүүлсэн гэх үндэслэлээр эрүүгийн хэрэг үүсгэж, яллагдагчаар татсан. Х.Нямбаатарт дуудан ирүүлэх хуудсыг удаа дараа хүргүүлсэн боловч ирээгүй. Түүнийг наймдугаар сард гадаад улс руу нэвтэрсэн гэх мэдээлэл байгаа тул Интерполд хандсан. Одоогоор Канад улсад түр оршин суугаа гэх мэдээлэл байна. Х.Нямбаатараас гадна таван албан тушаалтныг уг хэрэгт холбогдуулан албан тушаалаа урвуулан ашигласан гэмт хэрэгт яллагдагчаар татаад байна. Мөн Туул голын ногоон бүсийн ойн сан бүхий 7.2 га талбай өртсөн асуудал үүсээд байна.