Энгийн АИ-92 шатахууныг Евро-92 нэрээр борлуулах боломжгүй бөгөөд ийм зөрчил илэрвэл тухайн ШТС-ын тусгай зөвшөөрлийг цуцлах хүртэл арга хэмжээ авах юм. Мөн шатахууны савыг хооронд нь солих боломжгүй, учир нь хүхрийн агууламжийн зөрүүтэй холбоотой асуудал үүсэх эрсдэлтэй. Ашигт малтмал, газрын тосны газраас долоо хоногт хоёр өдөр түүврийн аргаар ШТС-уудаас дээж авч, лабораторийн шинжилгээгээр хяналт тавьж байгаа аж. Энэ талаар Шатахууны шуурхай штабаас өнөөдөр мэдээлэл хийлээ. 

АҮЭБ-ийн дэд сайд Б.Мөнхтамир: ОХУ-д нөхцөл байдал хүнд байгаа хэдий ч манай улс руу шатахууны нийлүүлэлтээ хэвийн үргэлжлүүлж байгаад бидний зүгээс талархаж байгаа. Гэхдээ нийлүүлж байгаа хэмжээ нь манай дотоодын хэрэгцээг бүрэн хангахад одоогоор хүрэлцэхгүй байгаа нь үнэн. Тиймээс бид нийлүүлэлтийн эх үүсвэрээ нэмэгдүүлэх, бусад улс орноос авах шатахууны хэмжээг өсгөх чиглэлээр ажиллаж байна. Тухайлбал, арваннэгдүгээр сард ОХУ-аас 70 мянган тонн, Казахстанаас 3 мянган тонн, БНСУ-аас 12 мянган тонн, БНХАУ-аас 8 мянган тонн буюу нийт 92.5 мянган тонн автобензин захиалгаар баталгаажуулаад байна. Үүнээс гадна энэ хэмжээг нэмэгдүүлэхээр аж ахуйн нэгжүүд хоёр, гурван чиглэлд хэлэлцээр хийж байгаа. Эдгээр хэлэлцээр амжилттай болбол арваннэгдүгээр сард нийт 100 мянган тонн орчим шатахуун авах боломжтой гэсэн тооцоо бий.

Арав гаруй хоногийн өмнө ШТС-уудад оочир, дараалал үүссэн. Тухайн үед шатахуун тээвэрлэлтийн асуудлаас шалтгаалж тодорхой хүндрэлүүд гарсан нь үнэн. Харин өнөөдрийн байдлаар ОХУ-ын нутаг дэвсгэр дээр Улаанбаатар хотыг чиглэн 218 вагон явж байна. Энэ нь энгийн үеийн хэрэглээгээр тооцоход ойролцоогоор зургаан хоногийн нөөц юм. Сүүлийн үед Улаанбаатар төмөр зам дээр олон тооны вагон хуримтлагдаж, аж ахуйн нэгжүүд зохиомлоор вагон үүсгэж байна гэх асуудал яригдаж байгаа. Гэхдээ ийм зүйл байхгүй. Монгол Улсад аравдугаар сараас арваннэгдүгээр сарын хооронд зунаас өвөлд шилжих бэлтгэл ажил өрнөдөг. Энэ үеэр аж ахуйн нэгжүүд, уул уурхайн компаниуд, тээврийн байгууллагууд зуны дизель түлшний хэрэглээгээ дуусгаж, өвлийн дизель түлшинд шилждэг. Тиймээс Улаанбаатар төмөр зам дээр хуримтлагдаад байгаа вагонуудын дийлэнх хувийг дизель түлш эзэлж байгаа юм.