Нийслэлийн 2027 оны төсвийг үр ашгийн эрэмбэд тулгуурлан хуваарилах бөгөөд түгжрэлийг бууруулах, агаарын бохирдлыг багасгах чиглэлд томоохон төслүүд хэрэгжүүлэхээр төлөвлөжээ. Энэ хүрээнд Туулын хурдны замын анхны трассыг өөрчилж, Яармагийн гүүрнээс 22-ын товчоо хүртэл мод, бургас хөндөхгүйгээр зургаан эгнээ хурдны зам барихаар төлөвлөж байгаа талаар Хотын дарга Б.Пүрэвдагва мэдээлэл өглөө.

Хотын дарга Б.Пүрэвдагва “Ирэх онд Яармагийн гүүрнээс баруун тийш буюу 22-ын товчоо хүртэл 14.3 км урт, зургаан эгнээ бүхий хурдны зам барихаар төлөвлөж байна. Түүнчлэн Өлзийт хорооллоос Эмээлт хүртэл шинэ зам тавина. Наадмын үеэр Хүй долоон худаг руу чиглэсэн замд 4-8 цаг түгжирч, баруун чиглэлийн 16 аймаг руу зорчих хөдөлгөөнд хүндрэл үүсдэг. Тиймээс энэ чиглэлийн замын хүртээмжийг нэмэгдүүлэх шаардлагатай. Эдгээр замын төслийг хэрэгжүүлэхэд өмнө нь Туулын хурдны замд зарцуулахаар төлөвлөсөн 500 тэрбум төгрөгөөс санхүүжүүлэх хүсэлтийг Авлигатай тэмцэх газарт хүргүүлсэн.

Мөн нэмэлт авто зам барихгүйгээр 307 хүний суудалтай, дугуйт галт тэрэг нэвтрүүлэх боломжийг судалж байгаа. Тус галт тэргийг Энхтайвны өргөн чөлөө болон Архивын ерөнхий газрын чиглэлд явуулах хувилбарыг судалж байна.

Агаарын бохирдлыг бууруулах чиглэлд гэр хорооллын 10 мянга хүртэлх айл өрхийг дулаалж, цахилгаан эх үүсвэртэй шинэ технологийн зуухаар хангах төслийг НҮБ-ын Хүүхдийн сантай хамтран хэрэгжүүлэхээр болсон. Иргэдийн амьжиргаанд нийцсэн санхүүжилтийн шийдлийг арилжааны банкууд болон олон улсын байгууллагуудтай хамтран боловсруулсан бөгөөд арваннэгдүгээр сарын 20-нд олон нийтэд танилцуулна. Үүнээс гадна НҮБ-ын Хөгжлийн хөтөлбөртэй хамтран гэр хороололд нарны эрчим хүчний мини-грид станц болон эрчим хүч нөөцлөх батарейн системүүдийг суурилуулж байгаа.