Хууль зүй, дотоод хэргийн яам болон харьяа агентлаг, байгууллагуудын үйл ажиллагааг олон нийтэд нээлттэй, ил тод хүргэх, салбарын бодлого, шийдвэр, ажлын үр дүнгийн талаар тогтмол мэдээлэл өгөх зорилгоор сар бүрийн сүүлийн долоо хоногийн мягмар гарагт “Нээлттэй яам – Мэдээллийн цаг” арга хэмжээг зохион байгуулж эхлэхээр болжээ. Энэ хүрээнд өнөөдөр Хууль зүй, дотоод хэргийн сайд Г.Тэмүүлэн цаг үеийн асуудлаар мэдээлэл хийж, сэтгүүлчдийн асуултад хариуллаа.

Сэтгүүлч: Нөмрөгтэй холбоотой асуудалд анхан шатны нэг албан хаагчид л хариуцлага тооцоод дуусах юм уу?

Хууль зүй, дотоод хэргийн сайд Г.Тэмүүлэн: Аливаа асуудал үүсэж, дотоод сахилга бат, хяналт алдагдсан тохиолдолд үүнийг зөвхөн анхан шатанд ажиллаж байгаа алба хаагчтай холбоотой асуудал гэж үзэхгүй. Харин тухайн нөхцөл байдал үүсэхэд нөлөөлсөн тогтолцооны, бодлогын болон засаглалын ямар алдаа байгааг цогцоор нь авч үзэж, дүн шинжилгээ хийх болно. Одоогоор агентлагийн дарга өөрийн эрх мэдлийн хүрээнд тухайн алба хаагчид хариуцлага тооцсон асуудал бий. Бүх дүн шинжилгээ дууссаны дараа миний бие өөрийн эрх мэдлийн хүрээнд дэд дарга нарын түвшинд хариуцлага тооцох болно. Тиймээс зөвхөн анхан шатны алба хаагчдаар хязгаарлахгүйгээр, холбогдох эрх бүхий албан тушаалтнуудад ч хариуцлага тооцно.